Në Gjykatën e Posaçme u mbajt seanca paraprake e aferës Partizani, e cila u shty sërish. Avokati Luan Hasneziri, i ‘Homeplan’ kishte paraqitur raport si i sëmurë, por GJKKO caktoi një avokat tjetër. Gjyqtarja nuk pranoi ta shtyjë seancën që në fillim dhe caktoi kryesisht avokaten Pranvera Daci.
Seanca vijoi me prapësimet e të gjithëve, ndërsa në fund gjyqtarja vendosi që për prapësimet e Homeplane të jetë vetë avokati Hasneziri. Vetëm për këtë qëllim u shty seanca më 23 prill ora 13:00, që pritet të jetë e fundit, dhe gjyqtarja Fjorela Davidhi do të tërhiqet për vendim.
Mbrojtja e të pandehurve kërkoi pushimin e çështjes, ndërsa SPAK i qëndroi kërkesës për kalimin e dosjes për gjykim dhe prokurori i çështjes Arben Kraja i ka dorëzuar me shkrim kundërshtimet në lidhje me pretendimet e avokatëve.
Avokatët e kreut të PD, Sali Berisha në prapësimet e tyre kërkuan pavlefshmërinë e akteve dhe pushimin e çështjes. Sipas tyre, aktet e ekspertimit janë bërë në shkelje të ligjit nga hetuesit e BKH, kur në fakt argumentuan ata, do duhej të bëheshin nga ekspertë të licencuar. Gjithashtu avokatët prapësuan provat për ndryshim destinacioni të “Klubit Sportiv Partizani”, me pretendimin se janë bërë sipas tyre nga kryeministri Edi Rama, teksa ngritën pyetjen se përse nuk i janë marrë deklarime këtij të fundit.
Të pandehur në aferën Partizani janë ish-kryeministri Sali Berisha, dhëndri i tij, Jamarbër Malltezi dhe 3 të tjerë. Prej 24 tetorit të vitit 2024, gati 6 muaj tashmë, seanca vetëm është shtyrë përmes makinacioneve të ndryshme. Në dy herët e fundit avokatët, një herë i Malltezit e më tej i të pandehurit Xhimi Begeja paraqitën raporte mjekësore si të sëmurë.
Dërgimi në gjyq i dosjes do të ishte përballja e parë reale e Berishës dhe Malltezit me drejtësinë shqiptare. Berisha ndodhet në masë “detyrim paraqitje” për korrupsion pasiv, masë të cilën e ka ankimuar në Gjykatën e Lartë. Dhëndri i tij Malltezi po hetohet në arrest shtëpie, i pandehur për korrupsion pasiv dhe pastrim parash.
Nga privatizimi i klubit sportiv ku përfitues ishte dhëndri i Berishës, u ndërtuan të paktën 19 kulla pallatesh. Me Berishën e Malltezin të pandehur janë edhe bashkëpunëtorët e tyre, biznesmeni Fatmir Bektashi, i pandehur për “korrupsion aktiv” dhe “pastrim parash”. Akuza e “pastrimit të parave” i është komunikuar edhe ortakut të Malltezit, Xhimi Begeja, trashëgimtar i tokës dhe bashkëpronar i ‘Homeplan’, si dhe Andia Pustinës, financieres që kryente të gjitha operacionet financiare dhe ligjore të Homeplan.
Shqetësimin për zvarritjen e seancave e ngriti edhe kreu i SPAK, Altin Dumani. Gjatë raportimit para KLP, Dumani tha se zvarritja e seancave paraprake po kthehet në shqetësim, ndërsa theksoi se rrezikohen edhe afatet e paraburgimit.
Dosja ‘Partizani’, të pandehurit:
-Sali Berisha, ish kryeministër – akuzohet për “Korrupsionit pasiv të funksionarëve të lartë shtetërore ose të zgjedhurve vendorë”, kryer në bashkëpunim, me Jamarbër Malltezin parashikuar nga neni 260 e 25 i Kodit Penal.
-Jamarbër Malltezi – dhëndri i ish-kryeministrit – akuzohet për “Korrupsioni pasiv të funksionarëve të lartë shtetërore ose të zgjedhurve vendorë”, kryer në bashkëpunim me Sali Berishën pasi në marrëveshje me këtë të fundit, duke shfrytëzuar pushtetin e ish Kryeministrit, ka arritur të marrë përfitimet e parregullta! Akuzohet dhe për “Pastrimit të produkteve të veprës penale ose veprimtarisë kriminale”, parashikuar nga neni 287 paragrafi i dytë i Kodit Penal
-Fatmir Bektashi – Ndërtuesi akuzohet “Korrupsionit aktiv të funksionarëve të lartë shtetërorë”, parashikuar nga neni 245 i Kodit Penal dhe ‘pastrim parash’
-Xhimi Begeja- Ortaku i Malltezit, trashëgimtar i tokës dhe bashkëpronar i ‘Homeplan’ akuzohet për ‘Pastrim Parash’
-Andia Pustina – Financierja që kryente të gjitha operacionet financiare dhe ligjore të Homeplan sh.p.k – Akuzohet për ‘Pastrim Parash’
