Partia Demokratike po planifikon një sërë skenarësh në vjeshtë me qëllim rrëzimin e reformës në drejtësi. Gazeta ka mësuar se përveç protestave që do të zhvillohen ku do i kërkohet dorëheqja kryeministrit, do ketë dhe lëvizje të tjera që do të kenë si qëllim rrëzimin e reformës në drejtësi. Si PD, ashtu dhe LSI kanë akuzuar fort kohët e fundit komisionerët e vetingut, ndërsa kanë sulmuar dhe vetë reformën. Basha pak ditë më parë doli me një paketë prej 7 kushtesh përballë mazhorancës, shumica e të cilave lidhen me reformën në drejtësi.
PD kërkon që përveç ligjit për SPAK, të gjithë ligjet e tjera të ndryshojnë. Po ashtu një kusht tjetër është që komisionerët e vetingut të largohen dhe të zgjidhen emra të rinj me konsensusin e palëve, pasi këta aktualë u zgjodhën me short. Një tjetër synim i opozitës është që 10 anëtarët aktualë të KLGJ dhe KLP të zgjedhur nga Kuvendi, të largohen dhe të zgjidhen emra të tjerë. Por si planifikon PD ta arrijë këtë? Mënyra e parë qo do të tentohet është ajo e konsensusit. Në shtator Rama ka premtuar se do i bëjë disa propozime opozitës që të bashkëpunojnë për integrimin.
PD pritet që të hedhë në tryezë disa prej këtyre kushteve. Por problemi është se PS e ka bërë të ditur se vetëm për reformën në drejtësi nuk negocion. Nëse nuk ndodh kjo, atëherë PD pritet që të marrë një aksion të dytë. Në fund të vitit pritet që Gjykata Kushtetuese të jetë konstituuar dhe PD do të ankimojë shumë ligje të reformës, përfshirë dhe disa prej atyre që gjykata nuk mori dot vendim për shkak të mungesës së kuorumit, pasi në atë kohë disa anëtarëve u kishte mbaruar mandati dhe për rrëzimin e neneve duheshin 5 vota.
Një tjetër lëvizje e PD do jetë bllokimi i Këshillit të Lartë Gjyqësor dhe Këshillit të Lartë të Prokurorisë. Kushtetuesja ka rrëzuar nenet themelore të ligjit për organet e reja të drejtësisë dhe nëse ato nene nuk rishikohet, KLGJ e KLP nuk marrin dot asnjë vendim. Këshilli i Legjislacionit do të nisë punën në vjeshtë dhe mësohet se draftet janë afër fundit. Por që ndryshimet të miratohen duhen 84 vota. PD pritet që të nisë bojkotin Parlamentar kur këto ndryshime të futen në rend dite. Po ashtu në skenarët e opozitës janë dhe kushtëzimi i reformës zgjedhore apo dhe tentativa për të rrezikuar hapjen e negociatave.
Bllokimi i KLGJ e KLP
Lulzim Basha ka propozuar që të rihapet gara për KLGJ e KLP. Momentalisht Parlamenti ka zgjedhur me short 10 anëtarë të tyre, që vijnë nga shoqëria civile dhe nga juristët. Ndërsa 12 të tjerë do zgjidhen nga gjykata dhe prokuroria, në mënyrë që këto organe të funksionojnë. Për Bashën emrat e zgjedhur nuk janë të duhurit. “Zgjidhja e situatës së paligjshmërisë në procedurën e përzgjedhjes së anëtarëve të jashtëm të KLGJ-së e KLP-së duke eliminuar nga gara të gjithë kandidatët që nuk plotësonin kriteret kushtetuese ligjore apo ishin përjashtuar nga OMN-ja dhe duke përsëritur procedurën e zgjidhjes.
§Një proces administrativ që është bërë në kundërshtim me ligjin dhe sipas ligjit është absolutisht e pavlefshme. Dhe këtu ka standard që mazhoranca i ka ndjekur shumë mirë në disa raste të mëparshme dhe të njëjtin standard duhet të ndjekë edhe këtu. KLGJ dhe KLP dhe anëtarët jo gjyqtarë dhe prokurorë duhet të zgjidhen sipas Kushtetutës dhe jo sipas qejfit apo ligjeve të njëanshme të mazhorancës dhe procedurave të shkelura edhe të këtyre ligjeve të njëanshme”, tha Basha në fund të korrikut. Madje kreu demokrat tha se PD ka hartuar dhe drafte me nenet konkrete ku duhet të ndërhyhet dhe pritet të prezantohen.
