Një raketë testuese, e planifikuar për të nisur lëshimet e satelitëve nga Europa, u rrëzua dhe shpërtheu brenda një minute pas ngritjes nga Norvegjia të dielën. Startup-i gjerman Isar Aerospace e cilësoi këtë si një test fillestar.
Spectrum, raketa pa ekuipazh, filloi të lëshonte tym nga anët dhe u rrëzua në një shpërthim të fuqishëm menjëherë pas nisjes nga porti hapësinor Andøya në Arktik. Pamjet e momentit u transmetuan drejtpërdrejt në YouTube.
Ky ishte fluturimi i parë orbital i synuar nga Europa, ndërsa disa vende, si Suedia dhe Britania, kanë shfaqur interes për t’u përfshirë në tregun në rritje të misioneve hapësinore komerciale. Raketa orbitale ishte dizajnuar për të vendosur ngarkesa, përfshirë satelitët, në orbitën e Tokës apo më tej.
Isar Aerospace, e cila e kishte paralajmëruar mundësinë e një dështimi të hershëm, deklaroi se testi gjeneroi një sasi të madhe të dhënash, të cilat do të shërbejnë për përmirësime të mëtejshme.
Raketa u ngrit nga platforma në orën 12:30 sipas kohës lokale dhe fluturoi për rreth një minutë, përpara se fluturimi të ndërpritej, tha kompania.
“Kjo lejoi ekipin të mbledhë një sasi të konsiderueshme të dhënash dhe përvojë për misionet e ardhshme”, u tha në deklaratën e Isar. “Pas ndërprerjes së fluturimit në T+30 sekonda, mjeti i lëshimit ra në det në mënyrë të kontrolluar.”
