Kreu i Partisë Demokratike, Sali Berisha doli para qytetarëve të njësisë 5 të kryeqytetit me zotimin se programi i opozitës do t’i japë zgjidhje problemeve të tyre.
Përpara se të vërë në jetë programin, demokratëve u duhet të fitojnë zgjedhjet. Për këtë, Berisha pati një paralajmërim ndaj atyre që quan kriminelë elektoralë.
“Këtu nga kjo sallë i garantoj organizatat kriminale se duart tuaja të zeza mbi votat e shqiptarëve do priten me gërshërët e ligjit.Se do shpalleni organizata terroriste, ashtu siç jeni dhe e meritoni. Qytetarët do e fitojnë betejën, kurse ju do keni vrimën e miut bashkë me Edi Ramën”, tha Berisha.
Por, gjatë prezantimit të kandidatëve për deputetë, Berisha bëri një krahasim paksa të çuditshëm. Sipas tij, diktatori Enver Hoxha ndërtoi një vilë modeste me 2000 metra katror oborr, por që nuk e regjistroi në emrin e tij, ndërsa Edi Rama ka ndërtuar saraje.
“Ne kemi patur fat të kemi diktatorin më të egër të Europës dhe Europa e quajti atë Hitleri shqiptar i pasluftës. Por të themi të vërtetën, ja ku e ka një shtëpi aty 3-4 katëshe.
Nuk e regjistroi në emrin e tij. Nuk e rregjistroi në emër të tij (pra ia la shtetit). Ndërtoi një vilë me një oborr 2000 metra. Kurse pasardhësi i tij ndërton saraje me gjatësi themelesh 57 metra”, u shpreh Berisha.
Kreu i PD mesa duket e ka harruar që vila e diktatorit është e sekuestruar nga familja e Qemal Biçakçiut dhe ende nuk dihet me siguri nëse qeveritë e 35 viteve e kanë kthyer tek i zoti.
Berisha vijoi më tej me sulmet ndaj SPAK, duke thënë se refuzuan që të hetojnë sarajet e Surrelit të kryeministrit. Sipas tij, më i zoti doli një gjykatës i Gjykatës së Tiranës duke detyruar, siç e quan ai “Skapin e partisë” që të hetojë çështjen.
“E kam një informacion me interes për ju që sapo e mora. Një gjykatës, besnik i ligjit i ktheu sot Skapit të partisë hetimin për sarajet e Surelit. Aty është një grop e zezë korrupsioni, por Skapistët e transferuan në prokuroinë e Tiranës.
Prokuroria e Tiranës do të hetonte kryeministrin, që me ligj dhe kushtetutë është vetëm SPAK-u. S’mundet ta hetojë Prokuroria e Tiranës kryeministrin imunitar. Por SPAK-u sërish e refuzoi. Dhe në fund doli një gjykatës, besnik i ligjit dhe urdhërioi Skapin që të hetojë çështjen”, tha Berisha.
Edhe emigrantëve, shumë prej të cilëve kanë marrë në duar zarfin me fletën e votimit, u kërkoi të mos fotografojnë votën e tyre duke u kujtuar se dënohet me ligj. Të zbatojnë ligjin gjatë fushatës elektorale, Berisha i kërkoi edhe administradës.
