Qeveria shqiptare po përflitet se po përdor një pajisje të quajtur Deep Packet Inspection (DPI) për të kontrolluar dhe ndaluar qasjen në TikTok. Tek ekspertët ky veprim ka ngritur shqetësime të mëdha mbi lirinë e internetit dhe të drejtën për privatësi në vend.
DPI është një teknologji e avancuar që lejon monitorimin dhe filtrimin e trafikut të internetit në mënyrë të detajuar. Me këtë pajisje, qeveria mund të identifikojë dhe bllokojë platforma specifike si TikTok, VPN-të dhe rrjete të tjera sociale; të monitorojë sjelljen e përdoruesve në internet, duke analizuar në kohë reale të dhënat e tyre dhe të filtrimin dhe censurimin e përmbajtjes, duke kufizuar aksesin ndaj informacioneve të caktuara.
Sipas ekspertëve, ndër rreziqet e përdorimit të DPI përmendet përgjim masiv ku çdo klikim dhe kërkim në internet mund të analizohet. Si rrezik i kësaj situate konsiderohet dhe censura e kontrolluar pasi platformat sociale mund të bllokohen pa paralajmërim. Gjithashtu privatësi rrezikon të shkelet pasi komunikimet personale mund të monitorohen. Por nuk duhet lënë pa përmendur dhe rreziku i abuzimit politik pasi teknologjia mund të përdoret për të manipuluar informacionin dhe për të ndikuar te liria e shprehjes.
Eksperti Tomi Kallanxhi tha për gazetarin Blendi Fevziu se bëhet fjalë për një pajisje interneti ku kalon i gjithë trafiku i internetit. Kallanxhi tha se kjo pajisje luan rolin e ndërmjetësit mes internetit dhe gjithçkaje që vjen prej tij dhe përdoruesit që bën kërkimet. Ai shtoi se pasi pajisja identifiokon të dhënat e aparatit selular, orës smart, Tv, apo çdo pajisje të kësaj natyre, nis më pas të profilizojë naviguesi.
Ekspeti tha se kjo pajisje mund të identifikojë se çfarë site-esh viziton një person, videot që shohim, kërkimet që mund të bëjmë në Google sepse këto janë url publike por edhe brendësitë e email-eve. Për aplikacionin Whatsapp ai tha se nuk mund të përgjohet brendësia e mesazheve, por vetëm biseda se me kë dhe kur dikush bisedon.
Nëse Deep Packet Inspection (DPI) është vendosur tashmë në funksion, liria e internetit dhe e fjalës është në rrezik serioz. Ky veprim mund të hapë rrugën për një kontroll edhe më të gjerë të përmbajtjes online dhe të vendosë një precedent të rrezikshëm për të ardhmen e demokracisë dixhitale në vend.
