Është dy herë historik suksesi i pasdites së sotme në Beograd, aty ku po zhvillohet Botërori i Mundjes. Zelimkhan Abakarov, një mundës rus që vendosi të përfaqësonte Kombëtaren e Shqipërisë, u shpall sot kampion Bote, në peshën 57 kg. Ai bëhet i pari kampion Bote në historinë e mundjes së Shqipërisë, sikurse është i pari sportist i huaj që siguron një sukses të tillë, në të gjitha disiplinat sportive, me ngjyrat e Kombëtares sonë.
Zelimkhan Abakarov, 29-vjeç i lindur dhe i rritur në zonën e Kaukazit, me shtetësi ruse, vendosi pak kohë më parë të përfaqësonte Kombëtaren e Shqipërisë ne sportin e Mundjes. Para se të niste përfaqësimin me Kombëtaren tonë ai u pajis fillimisht me nënshtetësi shqiptare. Si është e mundur që një sportisti i talentuar i një vendi të madh dhe të zhvilluar si Rusia lejon t’i largohen talentet dhe të ngjiten në majë të botës me flamurin e një vendi të vogël si Shqipëria?
Nisur nga ligji i Sportit që shpërblen me rreth 40 mijë euro një sportist elitar për titullin kampion Europe, 100 mijë euro nëse ai shpallet kampione Bote, dhe 150 mijë euro për titullin kampion Olimpik, ky vendim dhe shpërblimi ka bërë që gjatë viteve të fundit sportistë të vendeve të tjera, të joshen nga oferta dhe t’i bashkohen Shqipërisë. Nuk bëhet fjalë për sportistë nga vende të varfra, por të pasura, pasi gjatë viteve të fundit ekipit tonë kuqezi i janë bashkuar sportistë italianë edhe në not e ski.
Sporti është profesion dhe sportisti në radhë të parë kërkon të shpërblehet, duke qenë se edhe karrierën e tij e ka të shkurtër. Duket se në vendlindjen e tij, Abakarov, ndoshta edhe prej konkurrencës së lartë, nuk ka pasur vëmendjen e duhur, apo vlerësimin që meritonte. Ironikisht për të njëjtin shkak Elis Guri braktisi Kombëtaren tonë pak vite më parë, kur nuk jepej me ligj shpërblimi, dhe u shpall kampion Bote me Bullgarinë.
Me Shqipërinë, më herët Zelimkhan Abakarov fitoi medaljen e artë në 65 kg stil i lirë për meshkuj në Lojërat Mesdhetare 2022, që u zhvilluan në Oran të Algjerisë, duke dhënë premisa për suksese të tjera. Zelimkhan Abakarov ka shkruar sot dy herë historinë për sportin e mundjes në Shqipëri, teksa ka fituar medaljen e artë në peshën deri në 57 kilogram në Botërorin që po zhvillohet në Beograd dhe është sporti i vetëm i huaj që shpallet kampion Bote me ngjyrat e Kombëtares sonë. Një bast i fituar nga presidenti i Federatës Shqiptare të Mundjes, Sahit Prizreni, i cili kërkoi afrimin e Abakarov me Shqipërinë. Sportisti me origjinë ruse është po ashtu pjesë e klubit Tirana.
Talenti kërkon të motivohet, të shpërblehet para se të shpërblejë vendin që ai përfaqëson. /Liberale.al/
