Gjatë vitit që lamë pas plot 22 gjyqtarë dhe prokurorë kanë dhënë dorëheqjen nga detyra. Vetingu po avancon dhe deri më sot asnjë prej emrave me probleme pasurore ose në figurë nuk ka arritur të kalojnë filtrin e rivlerësimit.
Për më tepër një pjesë të madhe të emrave kanë nisur dhe hetimet penale, ndërsa Prokuroria e Posaçme sekuestroi pasuritë e 3 ish-anëtarëve të Gjykatës Kushtetuese dhe Gjykatës së Lartë.
Duke e ditur se mund të kenë pasoja më pas, shumë gjyqtarë e prokurorë kanë nisur të japin dorëheqjen. Nga të dhënat e siguruara në raportet vjetore të KLP dhe të KLGJ për vitin 2020, bëhet me dije se kanë dhënë dorëheqjet 6 prokurorë dhe 16 gjyqtarë.
“Në zbatim të nenit 64, pika 1 dhe 65 të Ligjit për Statusin, KLP është shprehur me vendim për mbarimin e statusit të magjistratit, për 6 prokurorë, të cilët kanë kërkuar dorëheqjen duke hequr dorë nga statusi i magjistratit. KLP ka përcjellë pranë organeve të rivlerësimit, KPK ose KPA, në varësi të fazës në të cilën ndodhej prokurori, vendimin për deklarimin e mbarimit të statusit, në mënyrë të KPK ose KPA të merrte vendim për pushimin e procesit të rivlerësimit”, theksohet në raportin e KLP.
Ndërsa Këshilli i Lartë Gjyqësor bën me dije se janë larguar me kërkesë të tyre 6 magjistratë, ku një pjesë kanë kërkuar të dalin në pension, ndërsa të tjerët kanë dhënë arsye të ndryshme. “Për vitin 2020 kemi 13 gjyqtarë të larguar përfundimisht nga sistemi me vendim të formës së prerë nga organet e rivlerësimit dhe 16 janë vendimmarrje të Këshillit lidhur me dorëheqjet dhe daljet në pension të gjyqtarëve”, thekson KLGJ në raportin vjetor.
Më tej evidentohet fakti se ka mungesë gjyqtarësh në sistem. Vetingu ka shkarkuar shumë emra dhe kjo ka sjellë vakanca. “Deri në fund të vitit 2020, në sistemin gjyqësor ka pasur në total 200 mungesa, përkatësisht 49 gjyqtarë dhe 151 personel administrativ, nga të cilët 134 në gjykata dhe 17 në KLGJ. Duke qenë se numri i gjyqtarëve, pagat e të cilëve kanë një efekt financiar më të madh në buxhet, është në ndryshim të vazhdueshëm për shkak të dorëheqjeve, pezullimeve dhe procesit të vetting-ut, njësia e buxhetit në KLGJ, ka monitoruar ecurinë e realizimit të fondeve buxhetore në këtë zë, për përdorimin sa më efiçent të tyre.
Si rrjedhojë, janë rialokuar fondet në shpenzime personeli nga njëra gjykatë në tjetrën, apo janë transferuar fondet nga shpenzime personeli në ato operative, sipas nevojave të paraqitura gjatë vitit ushtrimor, me miratim të Ministrisë së Financave dhe Ekonomisë”, thekson më tej KLGJ.
Të dhënat e KLP
Në raportin e KLP jepen detaje edhe për masat disiplinore që janë ndërmarrë ndaj prokurorëve. “Pranë KLP, janë paraqitur për procedim disiplinor nga ILD gjatë vitit 2020, çështjet si më poshtë vijojnë: – Kërkesa Nr. 251/31, datë 21.07.2020, e ILD “Për fillimin e procedimit disiplinor ndaj një magjistrati me detyrë prokurore pranë Prokurorisë së Rrethit Gjyqësor, Tiranë”.
Ky procedim përbënte një sfidë për punën e Komisionit të Disiplinës, përveç faktit që ishte procedimi i parë dhe praktika në këtë drejtim mungonte, por u zhvillua në kushtet ku nuk ishte miratuar ende rregullorja mbi funksionimin e komisionit disiplinor në zhvillimin e procedurave disiplinore ndaj prokurorëve; Kërkesa Nr. 1752/1, datë 16.07.2020, e ILD “Njoftim për fillimin e hetimit disiplinor me iniciativë për një magjistrat, me detyrë prokuror pranë Prokurorisë së Rrethit Gjyqësor, Krujë”. Në lidhje me procedimin e dytë, njoftimi për këtë hetim disiplinor ka ardhur në korrik 2020, por në fakt pranë KLP nuk ka ardhur ende zyrtarisht një kërkesë për vijimin e procedurave disiplinore”, thuhet në raport.
