Ambasada amerikane në Tiranë ka reaguar pas diplomimit të studentëve në Fakultetin e Drejtësisë në Tiranë.
Në një postim në Facebook, i ngarkuari me punë, Daniel Koski shkruan se korrupsioni është gjithandej dhe fshihet në vendet më pak të dyshimta.
Ai u bën thirrje të rinjve që të jenë të guximshëm dhe të demaskojnë korrupsionin e ta nxjerrin atë në dritë.
“Shpresoj të jeni faktorë ndryshimi për forcimin e integritetit të sistemit të drejtësisë në Shqipëri. Por, dijeni, se puna juaj nuk do jetë e lehtë. Korrupsioni është gjithandej dhe fshihet në vendet më pak të dyshimta. Ju bëj thirrje që të bëheni pjesë e një brezi të ri që kundërshton korrupsionin kudo që ta shihni. Dhe, ju sfidoj që të bëheni të guximshëm. Demaskojeni korrupsionin dhe nxirreni atë në dritë që ta shohin të gjithë. Kthejeni veten në mbrojtës të një sistemi etik drejtësie dhe heronj të atyre që ai u shërben… Dhe dijeni që Shtetet e Bashkuara gjithmonë do të qëndrojnë me ju për sa kohë ju përkrahni një sistem gjyqësor transparent dhe etik. Mbështetja jonë për atë kauzë dhe për ata që na bashkohen në çuarjen e saj përpara, nuk do të lëkundet kurrë dhe nuk do të dobësohet asnjëherë”, shkruan ambasada e SHBA.
