Shtetet e Bashkuara të Amerikës kanë treguar dje qartë se e kanë marrë seriozisht luftën ndaj të korruptuarve. Deri më tani ishte ambasada amerikanë në Tiranë që lëshonte paralajmërime, ndërsa ditën e djeshme ka ardhur një mesazh i fortë nga vetë Sekretari Amerikan i Shtetit, Mike Pompeo.
Në kuadër të Ditës Ndërkombëtare Kundër Korrupsionit, zoti Pompeo paralajmëroi se SHBA do të bllokojë vizat për të gjithë pushtetarët e korruptuar anë e mbanë botës. Ky mesazh vlen sidomos për Shqipërinë, pasi sipas Pompeo janë 40 persona që janë futur në listën e zezë dhe aty dominojnë shqiptarët. Pra, përveç Doshit, Dakos dhe Llallës, duket se emra të tjerë do hyjnë në rrethin e kuq të amerikanëve.
“Korrupsioni pengon zhvillimin dhe rritjen ekonomike, ndihmon krimin trans-kombëtar, nxit terrorizmin dhe u heq të drejtat bazë qytetarëve në të gjithë botën. Korrupsioni aftëson dhe mban në pushtet liderë autokratikë, dobëson besimin në sistemet demokratike dhe krijon mundësi që aktorë predatorë të përfitojnë nga partnerët e tyre. Ai krijon gjithashtu kriza politike dhe sfida qeverisjeje që vënë në rrezik sigurinë kombëtare”, deklaroi ai.
Do të ketë të tjera bllokime vizash
Në deklaratën e tij, zoti Pompeo bëri një bilanc për vitin 2019, ku DASH për shkak të përfshirjes në korrupsion madhor kishte shpallur “non grata” rreth 40 zyrtarë të huaj dhe anëtarët e familjeve të tyre, duke i futur në listën e atyre që u ndalohet hyrja së bashku me familjet në SHBA. Sipas tij,Uashingtoni, do ta vazhdojë më tej këtë praktikë, në shenjë hakmarrje ndaj të korruptuarve anembanë botës. “Në 2019, Departamenti i Shtetit ka caktuar publikisht 40 zyrtarë dhe anëtarët e familjeve të tyre si të përfshirë në korrupsion të konsiderueshëm, sipas Seksionit 7031(c) të Departamentit të Shtetit, dhe ligjit për operacionet e huaja 2019. Ne do të vazhdojmë të përdorim këtë autoritetet globalisht për të parandaluar që zyrtarët e korruptuar të udhëtojnë dhe të shpenzojnë fitimet e tyre të jashtëligjshme në SHBA”, nënvizoi Pompeo.
Pra, duket qartë që SHBA-të janë të vendosur për të luftuar korrupsionit e për të shpallur “non grata” pushtetarët e korruptuar, sikundër kanë bërë edhe me tre zyrtarë të Shqipërisë dhe familjet e tyre, të cilët dominojnë listën me 40 veta të DASH, që e çojnë në 14 numrin e përgjithshëm të individëve që u ndalohet hyrja në Amerikë. Zyrtari i fundit nga Shqipëria i përfshirë në këtë listë ishte ish kryetari i Bashkisë së Durrësit, Vangjush Dako. Ndërsa e njëjta masë është marrë më parë për ish-Prokurorin e Përgjithshëm, Adriatik Llalla dhe deputetin Tom Doshi. Në total janë mbi 170 zyrtarë dhe ish zyrtarë shqiptarë, së bashku me familjet e tyre, të cilëve, që prej vitit 2017 e deri më sot, u është mohuar ose revokuar viza për të udhëtuar drejt Shteteve të Bashkuara të Amerikës. Ndërkohë që, e njëjta gjë pritet të ndodhë edhe për gjyqtarët dhe prokurorët e ngelurit në veting. /Rigels Seliman
