Ilir Meta duket se nuk ka ndërmend të tërhiqet nga lufta me qeverinë. Tërmeti i sheshoi disi përplasjet, por Meta dje ka rinisur sulmet dhe akuzat, duke arritur deri aty sa ka paralajmëruar kryengritje kundër kryeministrit. I ftuar në një studio televizive, ai tha se nëse situata nuk qetësohet, vendi do të shkojë drejt përplasjes.
Por ai kërcënoi se do të ketë popullin pas vetes në luftën me qeverinë. Pra edhe pse është në krye të shtetit, Meta ka kërcënuar hapur dje qeverinë me kryengritje. “Ata përpiqen të tallen me popullin shqiptar. Nuk do t’i kthej gjërat personale, por dua tu sqaroj se për Ilir Metën, President i Republikës, Shqipëria është e para, populli është i dyti dhe Kushtetuta është e treta. Unë nuk tallem as me Shqipërinë, as me popullin dhe nuk bëj shaka me Kushtetutën. Është si është Kushtetuta, kjo është. Kush mendon se është leckë dhe mund ta përdhosë dhe poshtërojë ai përpiqet të poshtërojë popullin e Shqipërisë. Nëse vazhdon një lojë e tillë, do të çojë në një përplasje. Por presidenti nëse do ketë një përplasje, do të ketë popullin pas tij.
Mos të arrijmë që presidenti t’i bëjë thirrje popullit të ngrihet të mbrojë Kushtetutën. Kam shumë besim që populli shqiptar do jetë në krah të presidentit. Presidenca nuk është Bashkia e Kavajës dhe as Bashkia e Devollit që merret me kaçavida”, tha Meta dje.
Në sulm ndaj Ramës e Bashës
Presidenti dje ka lëshuar sulme të forta si në adresë të kryeministrit, ashtu dhe në drejtim të kreut të opozitës Lulzim Basha. Meta akuzoi Ramën se po tenton të kapë të gjitha pushtetet. Madje nismën për të rrudhur kompetencat e tija, i cilësoi si provokim për të hequr vëmendje nga situata e tërmetit. “Duan të provokojnë dhe të spostojnë vëmendjen se presidenti respekton një ftesë të prokurorisë, punë e tyre. Duan të bëjnë nga 12 vende që janë kundër negociatave, t’i bëjnë të gjitha. Presidenti do bëjë atë që thashë më parë për të evituar. Kaq”, tha ai. Por Meta sulmoi hapur dhe Bashën. Sipas tij, është faji i opozitës që dogji mandate duke i dhënë mundësi mazhorancës që të marrë më shumë pushtet. “Nuk i kanë dhënë shtatë ligjet asgjë këtij pushteti.
Normalisht duhej të votoheshin me opozitën. Edhe ato 140 vota, u bënë te zyra ime. Opozita ndoqi një kurs jo të arsyeshëm dhe jo normal. Edi Rama ishte i vendosur të kapur institucionet dhe opozita vendosi të delegjitimojë çdo gjë. Opozita ka kontributin në krijimin e një hapësire të kontrollit të gjithë institucioneve”, tha Meta. Nga ana tjetër presidenti nuk ka kursyer sulmet ndaj reformës në drejtësi dhe ndaj kreut të KED, Ardian Dvorani. Sipas tij, po bëhet gjithçka që të kapet Gjykata Kushtetuese. “Nuk i kanë dhënë shtatë ligjet asgjë këtij pushteti. Normalisht duhej të votoheshin me opozitën. Edhe ato 140 vota, u bënë te zyra ime. Opozita ndoqi një kurs jo të arsyeshëm dhe jo normal. Edi Rama ishte i vendosur të kapur institucionet dhe opozita vendosi të delegjitimojë çdo gjë”, tha Meta.
Tërmeti
Presidenti foli dhe për situatën pas tërmetit. Edhe pse është një katastrofë natyrore, presidenti e përdori për të kritikuar mazhorancën. “Nuk kam pasur asnjë informacion zyrtar, por sapo kam marrë informacionin se në Durrës ka disa persona nën rrënojat e godinave, kemi njoftuar përmes punonjësve të Gardës, Policinë e Durrësit për të dhënë ndihmën. Sapo kam marrë vesh që kemi një viktimë në Kurbin, e kam kuptuar se kemi një situatë serioze dhe kam shkuar në Spitalin e Traumës dhe më pas më Thumanë ku e kam kuptuar se do ketë jo pak viktima. Në atë moment kam folur me zotin Haradinaj, ku më ka thënë për mobilizimin për të ardhur në Shqipëri. Kam shkuar më pas në Durrës ku e kam parë se ishte si një situatë lufte. Shumë gjëra mund të ishin organizuar më mirë, por nuk mund të themi se nuk ka pasur një reagim të menjëhershëm”, tha Meta. /Kliti Topalli
