Këshilli i Emërimeve në Drejtësi hapi dje rrugën për plotësimin e 3 vendeve të tjera vakante në Gjykatën Kushtetuese. Pavarësisht luftës së madhe që po bëhet për këtë gjykatë, shumë shpejt ajo pritet të jetë funksionale, pasi numri i anëtarëve do të shkojë në 6, kuorum ky i nevojshëm për të marrë vendime.
Në mbledhjen e djeshme u konstituua KED për vitin 2020, ku në krye të këtij institucioni do të jetë sërish Ardian Dvorani, me zëvendëskryetare Vitore Tusha dhe anëtarë Fiona Papajorgji, Arta Marku, Miranda Andoni, Saida Dollani, Ludovik Dodaj, Fatjona Memçaj dhe Arjan Qafa. Po ashtu u konstituuan edhe anëtarët zëvendësues, të cilët janë: Marsida Xhaferllari, Bilbil Mete, Nazmi Troka, Nezir Gjoka. Por në një njoftim në faqen zyrtare, KED bëri me dije se u miratuan procedurat për 3 vendet e fundit vakante të shpallura nga Kuvendi dhe Presidenca, si dhe relatorët për këto çështje. Pas shortit të hedhur, anëtarja Saida Dollani u caktua relatore për çështjen e vendit të lënë vakant nga gjyqtari Fatos Lulo.
Ndërsa anëtarja Arta Marku në bazë të shortit u caktua relatore për çështjen e vakancës të krijuar nga gjyqtari Besnik Imeraj. Ndërsa për vakancën e krijuar nga gjyqtari Besnik Muçi u caktua si relatore anëtarja Miranda Andoni. “Vendi vakant, vakancë e parakohshme, në Gjykatën Kushtetuese, shpallur në datën 28.08.2018 dhe rishpallur në datën 21.08.2019 nga Kuvendi i Republikës së Shqipërisë, për shkak të mbarimit përpara kohe të mandatit të gjyqtarit Fatos Lulo. Relatore: Saida Dollani. 2. Vendi vakant, vakancë e parakohshme, në Gjykatën Kushtetuese, shpallur në datën 07.02.2018 dhe rishpallur në datën 27.09.2019 nga Presidenti i Republikës, për shkak të mbarimit përpara kohe të mandatit të gjyqtarit Besnik Imeraj. Relatore: Arta Marku. 3. Vendi vakant, vakancë e parakohshme, në Gjykatën Kushtetuese, shpallur në datën 22.11.2019 nga Presidenti i Republikës për shkak të mbarimit përpara kohe të mandatit të gjyqtarit Besnik Muçi. Relatore: Miranda Andoni”, thuhet në njoftimin e KED.
Përplasjet Presidencë-Parlament
Por ngritja dhe funksionimi i Kushtetueses pritet të sjellin sërish përplasje mes Presidencës dhe Parlamentit. Presidenti Ilir Meta prej disa kohësh po përdor një sërë tentativash për të kapur Gjykatën Kushtetuese. Prej disa muajsh ka nisur një luftë e fortë mes tij, KED dhe Parlamentit duke treguar edhe një herë se politika po bën çdo gjë për të pasur në dorë organet e drejtësisë. Kushtetuesja do vendosë fatin e presidentit dhe ky i fundit duket se po punon fort që të vendosë aty emrat e besuar. Këshilli i Emërimeve në Drejtësi ka publikuar pak ditë më parë raportin vjetor të 2019, ku ka treguar ndërhyrjet flagrante që ka kryer kreu i shtetit për kapjen e Kushtetueses. Sipas raportit, Meta i ka kërkuar sqarime KED se përse s’kualifikoi nga gara kandidaten Zhaklin Peto.
Por kush është Zhaklin Peto, e cila ka “ndezur” luftën Meta-Dvorani? Nëse kthehemi pas në kohë, Zhaklin Peto ishte kandidate në listën e Presidencës për vendin vakant në Gjykatën Kushtetuese. Pas verifikimit KED e përjashtoi nga gara dhe Peto e apeloi vendimin e KED në Gjykatën Administrative të Apelit, e cila e rikthehu sërish në garë. Por sërish KED nuk e pranoi dhe e largoi nga gara. Por sërish në listën e Metës është po i njëjti emër, i cili është skualifikuar nga KED. Pikërisht vendosja e të njëjtëve emra për vakancën e shpallur nga Presidenca, pritet të ashpërsojë dhe të rikthejë përplasjet Presidencë-Parlament-KED.
