Qeveria ka zbardhur detaje të reja sa i takon amnistisë fiskale dhe penale për pasuritë e padeklaruara të shqiptarëve brenda dhe jashtë vendit. Kryeministri Edi Rama gjatë fjalës së tij në Kuvend u shpreh se të gjithë qytetarët shqiptarë, përfshirë këtu edhe biznesmenët duhet të deklarojnë të gjitha asetet që disponojnë, duke shtuar se kjo amnisti përfshin si pasuritë brenda territorit të Shqipërisë, ashtu edhe jashtë saj.
Sipas shefit të qeverisë, deklarimet e pasurive duhet të bëhen brenda afatit të caktuar për të mos u përballur më pas sipas tij me ligjin. “Ne po përgatitemi të hymë në një tjetër nivel, që lidhet me nevojën që ka vendi, por dhe me përputhjen e sistemit të kontrollit me sistemin europian të kontrollit, që do të kërkohet që të regjistrohen, të deklarohen këtu në Shqipëri, të gjitha asetet dhe të ardhurat që shqiptarët kanë jashtë vendit dhe shteti shqiptar do të ketë detyrimin, por dhe kapacitetin falë koordinimit me të tjerët, për të kontrolluar të ardhurat dhe asetet e shtetasve të vet jashtë vendit.
Kështu që kjo është një thirrje, në radhë të parë, për të gjithë ata që janë biznesmenë me të ardhura të konsiderueshme, që kanë asete jashtë vendit, që t’i deklarojnë duke përfituar nga amnistia dhe të mos bëjnë shaka që mund t’i kushtojë shumë shtrenjtë pas përfundimit të amnistisë”, tha Rama. Kryeministri deklaroi më tej se pas konsultimit me grupet e interesit, amnistia fiskale do të miratohet shumë shpejt në Parlament. Rama theksoi se përmes miratimit të amnistisë, vendi do të përballet me një zhvillim të ri jo vetëm ekonomik, por edhe social. “Amnistia do të vijë në Parlament shumë shpejt, do të konsultohet paraprakisht me grupet e interesit, por jo shumë gjatë e do të vijë në Parlament, për t’u bërë pjesë e gjithë këtij procesi përpjekjeje për një zhvillim të ri të konsiderueshëm ekonomik dhe social të vendit”, tha Rama.
Përjashtohen politikanët
Por shefi i qeverisë bëri me dije se nga amnistia fiskale do të përjashtohen politikanët, duke theksuar se së shpejti edhe ata do ti nënshtrohen deklarimit të pasurisë. “Kjo nuk është në interes të askujt ndër ne, sepse ne që jemi këtu, nëse kemi gjëra të fshehura, nuk ka amnisti që na i lan dhe herët ose vonë do duhet që të vijë edhe dita e shumëpritur, nga unë të paktën, që të ndahet kjo punë, kush është kush në këtë histori, se që nuk jemi të gjithë njësoj, nuk diskutohet, mjafton të na shikoni nga gjatësia. Por është e padiskutueshme që ashtu sikundër pemët nuk janë njësoj, sikundër kafshët nuk janë njësoj, njerëzit jo e jo nuk janë njësoj dhe ata që merren me politikë absolutisht nuk janë njësoj. Ka nga të gjitha dhe besoj që kjo ndarje do të vijë, siç po vijnë shumë ndarje të rëndësishme, pak nga pak, por hap pas hapi dhe pa u lëkundur, në këtë vendin tonë që deri para disa vitesh dukej sikur nuk kishte shans të dilte nga kthetrat e atyre që e mbajtën peng për shumë e shumë vite dhe nuk kishte shans t’i shpëtonte oligarkisë më të madhe financiare, që ishte oligarkia e gjykatësve dhe e prokurorëve”, tha Rama.
Reagon Ministria e Financave
Por për amnistinë fiskale reagoi edhe ministrja e Financave, Anila Denaj. Në një reagim për mediat, Denaj u shpreh se format teknike të realizimit të kësaj amnistie janë duke u diskutuar. Ajo nuk bëri të ditur detaje nga këto forma, duke u shprehur se do të publikohen në momentin që amnistia do të linçohet. “Sigurisht kjo nismë do të jetë brenda standardeve ndërkombëtare. Synon që të përmirësohet një aspekt tjetër drejt formalizimit të ekonomisë, që ka nisur me procesin e fiskalizimit. Sigurisht që ky është një proces që nuk ka nisur tani. Për format teknike jemi duke diskutuar prej disa kohësh. Do të jepet një propozim për grupet e interesit shumë shpejt. Detajet do të jepen në momentin që reforma do të lançohet. Formalizimi i ekonomisë është një prioritet, edhe për masat që merren për barazinë e bizneseve mes tyre. Unë mendoj që kjo amnisti nuk është për një përfaqësi mazhorance, por për të gjithë bizneset”, tha Denaj.
