Shtohet numri i gjyqtarëve të shkarkuar nga vetingu. Vetëm dje, Komisioni i Pavarur i Kualifikimit shkarkoi 2 zyrtarë, konkretisht gjyqtarin e Gjykatës së Posaçme Antikorrupsion, Ardit Mustafaj dhe Skënder Halucin, kryegjyqtarin e Vlorës.
Hetimi për gjyqtarin Mustafaj kishte përfunduar në të tre kriteret e rivlerësimit, por ishin gjetjet në pasuri që e fundosën atë. Ishin konkretisht huat e deklaruara si burim krijimi për pasurinë apartament në Tiranë, dhe dhuratat nga prindërit e bashkëshortit. Lidhur me të parën, Komisioni i Pavarur i Kualifikimit konstatoi se huadhënësi nuk ka pasur të ardhura të ligjshme për huan 1 milion lekë, që gjyqtari ka deklaruar se e ka përdorur për blerjen e apartamentit 58 mijë euro. Të ardhurat nga prindërit e bashkëshortes gjithashtu u hetuan, që sipas Komisionit, nuk kanë pasur të ardhura të mjaftueshme për shumën 200 mijë dhrahmish. Por, nuk ishin vetëm këto konstatimet. Gjithashtu, pjesë e hetimit të Komisionit ishte edhe trajtimi preferencial për blerjen e pasurisë në fjalë, por gjyqtari Ardit Mustafaj dorëzoi një dokumentacion që provon të kundërtën. Ende nuk dihet në çfarë përfundimi ka arritur Komisioni për këtë detaj, ndërsa pritet vendimi i seancës.
Komisioni solli në seancën e 3 marsit edhe deklarimin e Mustafajt se burim krijimi për blerjen e apartamentit ishte dhe marrja e një kredie me kushte lehtësuese. Për këtë kredi, Komisioni i Pavarur i Kualifikimit, i ka dërguar barrën e provës gjyqtarit, pasi u ngritën dyshime nëse ai e ka pasur këtë të drejtë. Relatorja lexoi edhe argumentin e Mustafajt, i cili ka pretenduar se nuk kishte pasur shtëpi në vendin e punës dhe se kjo i ishte dhënë si anëtar i Gjykatës së Krimeve të Rënda. Sipas Mustafajt, kredia e butë ishte përdorur për të shlyer huan e marrë nga kunati dhe po ashtu edhe kredinë me kushte të tregut të përdorur për apartamentin. Përsa i përket hetimit të analizës financiare për periudhën 1996- 2003, Komisioni i Pavarur i Kualifikimit arriti në përfundimin se ka rezultuar negativ në shumën 6 milionë lekë, dhe në këtë analizë nuk është konsideruar si të ardhura të ligjshme huan nga kunati dhe disa të ardhura të bashkëshortes, dhurimet që ajo pretendonte se kishte marrë nga prindërit, një hua të dytë në shumën prej 1.7 milion lekësh të marrë për blerjen e një apartamenti në Sarandë në janar të vitit 2003. Ndërsa për dy kriteret e tjera, Komisioni bëri me dije se Mustafaj është vlerësuar pozitivisht.
Kush e fundosi kryegjyqtarin Haluçi
Viktimë e vetingut siç e përmendëm më lart ishte edhe kryegjyqtari i Vlorës, Skënder Haluci, i cili vite më parë u akuzua se ka tentuar të vrasë Ramiz Alinë. Seanca dëgjimore për Halucin nuk ishte e thjeshtë të zhvillohej, e cila herën e parë u shty, pasi kryegjyqtari kërkoi çeljen e hetimit për kriterin e figurës dhe aftësitë profesionale, e më pas kërkoi përjashtimin e trupës. Por seanca u shty, për tu zhvilluar një ditë më pas, ku Komisioni lajmëroi Halucin se kërkesa e tij u rrëzua, duke vijuar me evidentimin e gjetjeve. Gjatë relatimit u evidentuan mbi 15 pasuri të deklaruara nga kryegjyqtari Skënder Haluci, ku vihet re se ka bilanc negativ për krijimin e disa pasurive, ka mungesë dokumentacioni për të vërtetuar disa të ardhura të deklaruara, nuk ka sjellë informacion dhe dokumentacion për të vërtetuar të ardhurat të deklaruara. Gjithashtu relatorja e Komisionit të Pavarur të Kualifikimit relatoi se kryegjyqtari Haluci nuk ka deklaruar një pasuri në vitin 2003, dhe ka kryer veprime për përfitime financiare.
