Ministra e Shëndetësisë Ogerta Manastirliu ka theksuar edhe një herë sot se nuk parashikohet që vendi të shkoj drejt një mbylljeje tjetër.
Në një intervistë për A2, Manastirliu tha se situata po ndiqet me seriozitet nga ekspertët. Ndërsa nga kjo javë, maskat do të jenë të detyrueshme për çdo qytetar në ambientet e brendshme.
“Maska është e detyrueshme në ambientet e mbyllura. Tashmë, vendosja e maskës nuk është më një rekomandim, por edhe një përgjegjësi”, u shpreh ministrja.
Edhe pse Bashkimi Europian ka mbyllur kufijtë me Shqipërinë për shkak të numrave të lartë të infektimit, vendi ynë do të jetë i hapur madje edhe me Kosovën, e cila është në situatë më kritike nga përhapja e Covid-19.
“Nuk kemi një rekomandim nga komiteti i ekspertëve sa i përket izolimit të kufijve të Shqipërisë me vendet e tjera. Ndërkohë, BE ka rekomanduar përpara disa javësh listën e vendeve që lejohet të udhëtojnë dhe ato që ndalohen, por kjo varet nga kriteret epidemiologjike që vendos Qendra Europiane e Kontrollit të Sëmundjeve. Neve do të na duhet të presim se si do të vendosen kriteret epidemiologjike, nëse do të jenë të njëjtat apo do të ndryshojnë”, u shoreh Manastirliu.
Epidemia nuk parashikohet se si do të jetë në vjeshtë e dimër dhe as kushtet si do të zhvillohet viti i ri shkollor.
“Jemi duke punuar me Ministrinë e Arsimin dhe do të jenë 8 javë intensive për hartimin e skenarëve. Sot nuk mund të flasim dot për skenarët fiks në raport për atë që duhet të ndodhë”, u shpreh ministrja.
E pyetur për shkeljen e masave nga operatorët e transportit publik, Manastirliu u shpreh kundër mbylljes së këtij shërbimi, por kërkoi nga bashkia vijimin e kontrolleve. E akuzuar për keq-menaxhim të situatës, madje edhe nga paraardhësi i saj Ilir Beqaj, Manastirliu tha se pret sugjerimet e të gjitha palëve në këtë situatë.
