Sapo nga gjuha e Bashës doli akuza për fshehje viktimash nga ana e Ramës, të parët që dolën për të rrëzuar ishin të shumënjohurit bluza të bardha të Infektivit, me në krye dr. Najada Çomon, e pas saj, dr. Tritan Kalon, pa llogaritur të tjerët kolegë të tyre, asnjëri, individualisht apo grup, të përfolur për ndonjë abuzim profesional, cen moral, e aq më pak për militantizëm partiak.
Integriteti i tyre publik është diçka e provuar dhe e vërtetuar në kohë, e dalë në pah dhe gjatë krizës pandemike.
Kjo krizë ka një specifike; atë që nëse ngre ndonjë akuzë, nuk ka gjasë që ajo mos prek stafet mjekësore.
Pra, edhe në pastë ikur mendja Ramës, e ka vendosur të gënjejë për numrin e jetëhumburve, nuk asgjë gjasë që të mos ketë bashkëpunëtorë në këtë paudhësi, siç opozita pretendon, pikërisht stafet mjekësore.
Mirëpo vëreni me kujdes një frazë të Bashës në një reagim të fundit mbi aferën e përfolur mortore.
“Mashtrimi me shifrat zyrtare është përgjegjësi e Ramës, jo e mjekëve që po sakrifikojnë gjithçka në këtë betejë”(!!!).
Cilët mjekë vlerëson Basha? Mjekët nuk janë bashkësi amorfe Vlerëson mjekët e Infektivit? Ata i dolën kundër dhe e rrëzuan me deklaratë. Komiteti i Ekspertëve përbëhet po ashtu nga mjekë. Bëjnë pjesë ata në vlerësimet e Bashës?
Ja këto duhen sqaruar.
Eshtë tipike në ligjërimin e Bashës; një mungesë e konkretes, një mungesë e zbërthimit logjik të diçkaje, argumentimit të detajuar të asaj që mbron apo pohon, duke u mjaftuar me përgjithësime me theks të dukshëm e të bezdisshëm dogmatik në ligjërim, prej së cilit rrjedhin dhe nonsense të tilla.
Sepse, si mundet të mos fajësohen mjekët e të fajësohet Rama, për një diçka që patjetër, nëse ka ndodhur, ka për bashkëpunëtorë mjekët. Pra, hipotetikisht, nëse ka ndodhur, Rama mund të ketë patur thjesht një ide, djallëzore në këtë rast, por procedurat mortore e gjithçka tjetër është në dorë të bluzave të bardha. Përkthyer ndryshe, ai stafi i Infektivit, me emra si dr. Çomo e dr. Kalo, o janë dhe ata pjesë të kësaj afere, o nuk ka asnjë mundësi që të jetë Rama e jo ata. Pra, Basha o duhet të përfshijë dhe ata nën akuzë, o nuk ka asnjë sens logjik që të shfajësojë ata e akuzojë Ramën. Gjithnjë nëse flasim për një vijë logjike minimale që duhet të shoqërojë një akuzë.
Opozita mjekësore
Që në krye të krizës pandemike, opozita ka bërë opozitën e saj tipike, por pa marrë parasysh në asnjë rast specifikat e saj në ndërtimin e akuzave, për t’i bërë ato mininalisht bindëse. E para: që kjo është një krizë globale dhe jo lokale. E dyta: se kriza ka në krye një Komitet Ekspertësh, ku asnjëri prej tyre nuk ka patur apo ka ndonjë pozicion politik, që mund ta kompromentonte në qëndrime.
Përkundër kësaj, një prej emrave, një infermier me të cilët opozita ndërtoi ndër të parat akuza, Ilir Allkja, i cili pretendonte se qeveria e kishte lënë pa veshje speciale, gjë që u vërtetua që ishte gënjeshtër e pastër, pasi vetë ishte fotografuar me to në ambiente spitali, ishte ndër të tjera dhe një militant partiak prej atyre që merrnin pjesë rregullisht në protestat e opozitës.
Tjetri, Gazmend Koduzi, ndër zërat kryesorë të opozitës në ballafaqime televizive, është aty me pozicion politik, para se të jetë mjekësor, si kreu i kreu i Departamentit të Shëndetësisë në PD. Pos kësaj, ai, si dhe të tjerë figura mjekësore të opozitës, nuk janë parë, qoftë dhe për etikë profesionale, që të marrin një rol në “vijën e parë të zjarrit”. Pra, thjesht bëjnë politikanin e jo mjekun, por kundër kujt? Kundër kolegëve të tyre jopartiakë.
Pra është një partiak. Dhe përballë në ballafaqime nuk ka në asnjë rast partiakë si ai, thënë kjo në funksion të ekuivalencës në përballje. Përballë ka vetëm profesionistë pa parti. Dhe ish-ministri i Shëndetësisë Gjergj Koja, një ish-socialist i kohës “Nano”, aktiv kohët e fundit në debate dhe më së shumti përballë Koduzit, prej kohësh është larg politikës, larg PS-së, pa pozicione shtetërore dhe pa qenë pjesë e ekipt Rama në asnjë nivel pushteti.
Ata, personazhet aspak mjekësore e tërësisht politike të PD-së, në dukje akuzojnë qeverinë, por në thelb akuzojnë kolegët e tyre. Eshtë lloji i krizës që çon në këtë përfundim.
Rasti “Pipero”
Dr. Pëllumb Pipero, një ndër epidemiologët e njohur ndër vite, ish-kreu, u bë popullor këto kohë për prognozat e tij ndaj sëmundjes COVID. Dikush e vlerëson e dikush edhe bën ironi me protagonizmin e tij. Por ai ka treguar një integritet të padiskutueshëm moral dhe profesional, duke qenë njëherësh i vetmi emër në elitën e bluzave të bardha të kësaj krize që kë profilin e tij siglën e një partie. Dhe një partie jo dosido, por që s’snjeh asnjë skrupull moral, gjithashtu dhe në këtë krizë.
Pipero ka qenë pranë LSI-së, ndoshta dhe vijon të jetë, së paku si kandidat për të qenë deputet i saj, por ka zgjedhur të bëjë mjekun e jo gërrnjarin e rëndomtë politik.
Ndaj, vërtet që COVID-i po vë në provë, jo vetëm shëndetin e çokujt, por dhe karakterin e çdokujt./tesheshi.com
