Vijojnë lëvizjet e forta në prapaskenë sa i takon ngritjes së Gjykatës Kushtetuese. Edhe pse ambasadorja Yuri Kim ka dërguar disa herë mesazhe se gjykata duhet të jetë gati brenda vitit, nga KED po jepen sinjale se mund të ketë dhe vonesa.
Momentalisht në Këshillin e Emërimeve në Drejtësi janë dy vakanca që i takojnë presidentit, ajo e datës 22.11.2019 dhe ajo e datës 29.09.2020. Sipas të dhënave nga mbledhjet e KED, për vakancën e vitit 2019, procesi është mbyllur tërësisht. Janë kualifikuar për këtë vakancë Altin Binaj dhe Sonila Bejtja.
Zoti Binaj u zgjodh nga Kuvendi të enjten si anëtar dhe kjo do të thotë se presidenti duhet të zgjedhë zonjën Bejtja. Ende nuk dihet se përse KED nuk ka marrë një vendim për këtë vakancë. Sa i takon vakancës së dytë deri më tani janë kualifikuar: Altin Binaj; Aleksandër Toma dhe Përparim Kalo. Sa i takon kësaj vakance, KED po pret dhe vendimet gjyqësore. Për shembull, kandidatja Zhaklin Peto u kthye në garë.
KED duhet të marrë një vendim për të apo dhe emra të tjerë që mund të fitojnë në Apel. Më pas duhet të bëhen intervistat me kandidatët dhe të ketë një vendim për emrat që do shkojnë në Presidencë. Më pas presidenti duhet të zgjedhë një mes tyre dhe të bëhet ceremonia e betimit. Pra jemi 10 ditë larg datës 31 dhjetor, afat i vënë nga SHBA dhe sinjalet janë se mund të kemi vonesa. KED do të mblidhet sot dhe kur pritej që të merrej një vendim për vakancat, bëhet me dije se në mbledhje do të bëhet vetëm miratimi i procesverbaleve të mbledhjeve të fundit.
Ultimatumi amerikan
Ambasadorja e Shteteve të Bashkuara të Amerikës, Yuri Kim të enjten përshëndeti votimin e anëtarit të 5-të të Gjykatës Kushtetuese Altin Binaj. Kim u shpreh se KED duhet të veprojë shpejt që të dërgojë emrin te Presidenti në mënyrë që Gjykata Kushtetuese të jetë funksionale. Deklarata e Kim ishte dhe një mesazh se nuk do lejohen pazaret e KED me presidentin për dy vakancat e mbetura. “Lajm i madh, Parlamenti miratoi gjyqtarin për Gjykatën Kushtetuese. Shqipëria tani ka nevojë për një Gjykatë Kushtetuese funksionale.
Ne shpresojmë që KED të dërgojë listën e kandidatëve tek presidenti sa më shpejt të jetë e mundur. Kjo është një arritje madhore, e cila do ta lëvizë Shqipërinë një hap më afër BE-së dhe pasqyron bashkëpunimin e fortë mes KED, Presidentit dhe Parlamentit”, tha Kim. Ndër të tjera Kim theksoi se reforma në drejtësi duhet të vazhdojë, ndërsa theksoi se SHBA do të vazhdojë të mbështesë Shqipërinë. “Reforma në drejtësi nuk do të jetë e lehtë, e shpejtë ose e përsosur, por po bën përparim hap pas hapi dhe duhet të vazhdojë.
Flamuri i Shteteve të Bashkuara do të vazhdojë të mbështesë fuqimisht dëshirën e njerëzve të Flamurit të Shqipërisë për një sistem gjyqësor që është transparent, i drejtë dhe plotësisht funksional”, tha ambasadorja. Pra amerikanët kanë dhënë mesazhe të vazhdueshme gjatë gjithë këtij muaji dhe tashmë topi ka kaluar në Presidencë. Një vit më parë ishte Meta që hyri në konflikt me Kuvendin dhe Presidencën dhe mbetet të shihet se si do të vijohet këtë vit. Por fakti që po hasen vonesa tregon se në prapaskenë po luhet lojë e fortë, kjo pasi presidenti kërkon që të ketë të besuarit e tij në Kushtetuese.
