Sali Berisha vijon të këmbëngulë te rrëzimi i pushtetit me dhunë. Ditën e djeshme ai i dërgoi një mesazh liderit demokrat Lulzim Basha, duke thënë se opozita duhet të përgatitet për zgjedhje paqësore, por nëse preken zgjedhjet duhet të ketë revolta.
“Opozita duhet të përgatitet për ditën më paqësore me votën e saj më 25 prill, por njëkohësisht duhet të jetë gati për një 20 shkurt të dytë. Në 20 shkurt shqiptarët përmbysën në pamje të parë një bronz, por në të vërtetë një kult më të keqin që kishin pasur në histori.
Nëse iu dhunohet vota, opozita do të përmbysë më 25 prill kultin e më të ligut që kanë pasur pas Enver Hoxhës, që grabit zgjedhësit, për një kryebandit që nuk njeh normë, nuk njeh ligje, moral dhe nuk respekton asgjë”, ka thënë Berisha mbrëmë në “Ora News”. Ai u ndal dhe te protestat e javëve të fundit.
Ish-kryeministri Sali Berisha u shpreh se i qëndron fjalëve që ka thënë në konferencën e 21 janarit 2011. Ai nuk shfaqi asnjë pendesë. “Çdo fjalë që kam thënë në atë konferencë shtypi, i qëndroj se nëse është qëlluar me plumba nga protestuesit, dëshmi janë xhamat e mi të zyrës që janë shpuar nga plumbi dhe ato ruhen edhe sot.
Është e vërtetë që kam deklaruar se janë qëlluar nga afër, por ky ishte informacioni që vinte nga spitali ushtarak. Këto dokumente zyrtare u ndryshuan dhe u tha se nuk u qëllua nga afër. Unë nuk heshta as tre orë dhe kam dalë në konferencë shtypi dhe kam deklaruar ngushëllime familjes dhe hetim për ngjarjen. Askush prej tyre nuk u qëllua në pragun e shtëpisë së tyre, por sepse ndoqën një axhendë ndërkombëtarisht të pranuar nga OSBE.
Gjëja më ë mirë ishte të mos qëllohej”, tha ai. Më tej ai u shpreh se në Parlament ka kërkuar që të shpallen vrasje shtetërore pa dashje ato të Gërdecit. “Në parlament kam kërkuar që të shpallen vrasje shtetërore pa dashje. E kam kërkuar këtë sepse Gërdeci ishte aksident teknologjik.
Ajo ishte teknike e tillë, por kishte edhe një përfshirje shtetërore. Atëherë meqë kishte ndërmarrje shtetërore për sigurinë, padyshim kishte një përgjegjësi shtetërore. Unë bëra gjithçka dhe u rindërtua ajo zonë me miliona euro. Unë kërkova që të shpalleshin vrasje shtetërore pa dashje. Këta që përdorën Gërdecin vazhduan që ta përdorin këtë term në gjykatë”, tha ai.
