Presidenti Ilir Meta duket se do të ketë shumë telashe nga amerikanët. Paralajmërimi që ambasadorja e Shteteve të Bashkuara të Amerikës në Tiranë, Yuri Kim i bëri ditën e premte presidentit Meta, ishte rasti më i paprecedentë në historinë e Shqipërisë dhe pasi të mbarojë zhurma e zgjedhjeve parlamentare pritet të ketë të tjera zhvillime.
Meta gjatë gjithë këtyre ditëve ka bërë thirrje për kaos, ndërkohë që kjo qasje e presidentit nuk është pëlqyer nga Uashingtoni. Ky i fundit përmes ambasadores Kim ka deklaruar prerë se kushdo që bën thirrje për gjakderdhje do të mbajë përgjegjësi. Por presidenti Meta nuk reflektoi dhe ai e sulmoi shumë ashpër diplomaten Kim, lajm ky që bëri jehonën e mediave botërore. Kjo ka bërë që amerikanët të vihen në lëvizje. Gazeta ka mësuar se SHBA pas zgjedhjeve do të marrë masa ndaj kreut të shtetit.
Dyshime për shpalljen “non grata” të Metës
Sipas informacioneve, mësohet se amerikanët po presin mbarimin e zgjedhjeve dhe lëvizjen që do të bëjë Partia Socialiste, pasi lideri i saj, Edi Rama ka paralajmëruar shkarkimin e Metës, për të zbuluar vendimin që ata kanë rezervuar për presidentin. Mësohet se kjo strategji është ndjekur për shkak se amerikanët e kanë më të lehtë që të ndërmarrin një masë të fortë për një zyrtar, kur ai është zhveshur nga posti, siç ndodhi me ish-Kryeprokurorin Adriatik Llalla, që është person i padëshiruar në Amerikë.
Në 2017 Llalla pati një përplasje të fortë me ish-ambasadorin Donald Lu për përbërjen e KED dhe pas disa replikave në distancë, menjëherë sapo ai u largua nga kreu i akuzës u shpall i padëshiruar. Madje, një sinjal dhe dyshimet për shpalljen “non grata” të Metës nga amerikanët e ka pohuar edhe gazetari që banon në Shtetet e Bashkuara të Amerikës, Ilirjan Blloshmi. Ky i fundit përmes një statusi në rrjetet sociale thotë se Departamenti Amerikan i Shtetit e ka shpallur “non grata” presidentin Meta, vendim që pritet ta bëjë publik pas zgjedhjeve. “Tani po që e kuptoj Ilir Metën. Sipas burimeve konfidenciale, ambasadorja amerikane i ka thënë Ilir Metës se është shpallur person “non grata” në USA. Vendimi do të bëhet publik pas zgjedhjeve. Nuk ka rendësi kush i fiton ato”, shkruan gazetari Blloshmi.
Ngjela paralajmëron dënimin e Metës
Por telashe për presidentin Ilir Meta ka paralajmëruar edhe avokat Spartak Ngjela. Ky i fundit teksa ka komentuar debatin e ambasadores së SHBA në Tiranë, Yuri Kim me presidentin Ilir Meta, shkruan në rrjetet sociale se amerikanët do ta ndëshkojnë kreun e shtetit. Sipas tij, Meta po bën trimin me amerikanët nga frika dhe paniku. “Me paraushtarakët e tyre, PD dhe LSI kishin menduar ushtrim terrori ditën e zgjedhjeve, për të arritur destabilizimin e Shqipërisë.
Por, u kapën. U kërcënuan dhe krerët e Partisë Demokratike hoqën dorë nga skema. Kurse, pikërisht në këtë kohë, Ilir Meta, në vend të shpallë falimentin e tij politik, po bën trimin, po bërtet për ushtrim force dhe thotë: “amerikanët do më vrasin”. E kujt po ia thotë këtë? Shqiptarët po qeshin me të masivisht, kurse ai mendon se mund të kërcënojë ambasadoren amerikane në Tiranë me një marrëzi fjalësh, sepse, në gjendje transi psikik siç është, frika e bën të thërrasë me britma të kota. Por, a e keni parë të vetmuarin në pyll që bërtet? E ka nga frika.
Por, duke folur marrëzira, Meta e detyroi ambasadoren e Shteteve të Bashkuara në Tiranë t’i thotë fjalën e fundit: “kërcënimet meritojnë dënim” i tha ajo. Kurse shqiptarët janë më optimistë tani, sigurisht, sepse të lodhur nga krimi shtetëror, po e shohin që krimi shtetëror është në grahmat e fundit”, shkruan ai. Më tej avokat Ngjela thekson se amerikanët kanë zbuluar krimet e Metës dhe se ky i fundit sipas tij, është kapur gafil. “Ky i mjerë nuk është në gjendje të kuptojë se është i kapur në krim, dhe krimin e ka kryer kundër shqiptarëve, por ka cenuar edhe ligjin ndërkombëtar. Nuk mund të shpëtojë nga kjo akuzë me një forcë imagjinare. Pse, me çakejtë e rrugës nëpër rrugicat e qyteteve shqiptare do të mundë Amerikën ky Meta, Meta”, nënvizoi Ngjela.
