Shtetet e Bashkuara të Amerikës kanë vulosur procesin zgjedhor ë 25 prillit. Pavarësisht kontestimeve dhe akuzave të presidentit Ilir Meta, Washingtoni ka njohur Ramën si kryeministër dhe ka kërkuar nga të gjithë që të njohin rezultatin.
Zëdhënësi i Departamentit Amerikan të Shtetit i ka cilësuar këto zgjedhje si legjitime. Ai thekson se palët duhet të njohin rezultatin dhe të nisin bashkëpunimin për të mirën e shqiptarëve.
“SHBA përgëzon popullin e Shqipërisë për zgjedhjet e tyre të fundit. Ne shpresojmë të vazhdojmë partneritetin tonë të ngushtë me kryeministrin Rama dhe të përgëzojmë fushatën e fortë të opozitës. Respektimi i rezultateve të zgjedhjeve legjitime forcon demokracinë e Shqipërisë”, thuhet në njoftim.
Edhe ambasadorja e SHBA-së, në Tiranë, Yuri Kim ka uruar kryeministrin Rama për fitoren në zgjedhjet e 25 prillit. Me anë të një postimi në rrjetet sociale ajo u shpreh se edhe fushata e opozitës ishte një fushatë e fortë që frymëzoi shpresë. Kim ka bërë thirrje për bashkëpunim mes palëve ndërsa ka kërkuar që palët të njohin rezultatin e zgjedhjeve. “Ne e përgëzojmë kryeministrin Edi Rama, Partinë Socialiste në fitoren e tyre elektorale.
Ne gjithashtu përgëzojmë kryetarin e PD-së Lulzim Basha për udhëheqjen e një fushate të fortë që u dha zë shumëkujt dhe frymëzoi shpresë. Më e rëndësishmja, ne e përgëzojmë popullin shqiptar, i cili foli qartë. Duke njohur rezultatet e këtyre zgjedhjeve dhe duke bashkëpunuar me njëri-tjetrin, udhëheqësit do të veprojnë me përgjegjësi për të mirën e popullit shqiptar”, tha ajo. Kim u shpreh se puna për të forcuar bashkëpunimin midis dy vendeve do të vazhdojë.
Ajo ka pasur edhe një thirrje për gjyqësorin për të ndjekur penalisht cilindo që shkel ligjin. “Ne shpresojmë të punojmë me Shqipërinë për të forcuar më tej bashkëpunimin mbi demokracinë, mbrojtjen dhe biznesin. Ne përsërisim që zbatimi i ligjit dhe gjyqësori duhet të ndjekin penalisht cilindo që shkel ligjin dhe pengon të drejtën e qytetarëve për të votuar lirshëm dhe në paqe”, shkruan Kim.
Ambasadori gjerman thirrje palëve për bashkëpunim
Ndërkohë edhe ambasadori gjerman në Tiranë, Peter Zingraf ka uruar kryeministrin Edi Rama për fitoren e zgjedhjeve të 25 prillit. Ai tha se zgjedhjet u zhvilluan të qeta. Zingraf tha se po ashtu është duke u pritur edhe raporti përfundimtar që do të bëjë OSBE. “Dita e zgjedhjeve rrodhi e qetë dhe thuajse kudo e qetë.
Fakti, që një numër i madh qytetarësh shqiptarë dhanë votën e tyre, bën të qartë dëshirën për të bashkëvendosur. Kodi i ri Zgjedhor e kaloi me sukses testin e tij të parë. Procesi zgjedhor vijoi përgjithësisht pa fërkime, administrata zgjedhore në nivel qendror dhe lokal bëri një punë të mirë, falënderimi im u takon atyre. Ne kemi ndjekur raportin paraprak të OSBE/ODIHR dhe jemi duke pritur atë përfundimtar”, tha ai. Ndër të tjera, ambasadori gjerman tha se të gjitha ankesat duhet që të hetohen. Ai bëri thirrje që palët të njohin rezultatin e zgjedhjeve dhe të bashkëpunojnë.
“Të gjitha akuzat dhe ankesat, që kanë të bëjnë me zgjedhjet, mes tyre edhe ato për shit blerjen e votës, duhet të trajtohen pa vonesë dhe me vendosmëri në këtë pikë Komisioni Qendror i Zgjedhjeve dhe organet e drejtësisë duhet të marrin përsipër një përgjegjësi të rëndësishme. Unë shpresoj që të gjithë aktorët politikë të kenë edhe në të ardhmen një qasje konstruktive dhe bashkëpunuese ndaj njëri-tjetrit. Krahas kësaj presim që ata të njohin rezultatin e zgjedhjeve”, tha ai.
