Komisionit Qendror të zgjedhjeve i janë dashur plot tre ditë për të nxjerrë të dhënat e pjesëmarrjes së votuesve në zgjedhjet e 25 prillit. Në zgjedhjet e mëparshme KZQ nxirrte të dhënat mbi numrin e votuesve në mbrëmje pasi mbyllej procesi i votimit, duke saktësuar se sa ishin femra dhe sa meshkuj.
Ndërsa këtë herë, kur pritej që me ndihmën e pajisjeve elektronike në zhvillim rezultatet të dilnin më shpejt, KQZ ka mundur të publikojë të dhënat e plota pas tre ditësh.
Fakti që publikimi i këtyre të dhënave u vonua kaq nuk është pozitiv dhe nuk dihet se ku çaloi puna, por ajo që bie në sy është fakti që, në këto tre ditë KQZ ka publikuar të dhëna të ndryshme mbi votuesit. Konkretisht, kujtojmë se, ditën e diel u njoftua se pjesëmarrja në zgjedhje arrinte nivelin e 48.2%, ndërsa ditën e martë u reduktua në 45.7%.
Ndërkohë ditën e djeshme kreu i KQZ, Ilirjan Celibashi, doli në një deklaratë për mediat ku informoi se të dhënat përfundimtare tregojnë për pjesëmarrje të qytetarëve në zgjedhje rreth 46.3%. Pra, përveç faktit se KQZ u vonua në punën e saj për të publikuar këto të dhëna, por në pakorrektësi publikoi të dhëna të ndryshme në çdo ditë.
“Tashmë që është mbyllur komplet procesi i nxjerrjes së rezultatit për 5199 qendra votimi, në lidhje me pjesëmarrjen, shifrat janë këto: Shifrat e publikuara bazohen në tabelat e rezultateve dhe sipas tyre 46.32% nga këto, 46.7% janë gra dhe pjesa e ngelur janë burra”, raporti ai. Ndër të tjera të dhënat e KQZ tregojnë se pjesëmarrja në këto zgjedhje ka qenë më e lartë në raport me zgjedhjet e 2017, gjithsesi numri i qytetarëve të regjistruar në lista ishte më i ulët në 2017.
Konkretisht, në 2017 pjesëmarrja ishte 4.5%, pra votuan 1, 613,470 qytetarë, ndërsa të drejtën e votës e kishin 3. 451.896 qytetarë. Ndërkohë në zgjedhjet e 25 prillit morën pjesë në zgjedhje, 1.662. 253 qytetarë, ndërsa në lista ishin regjistruar 3. 558. 869 qytetarë, pra 107.793 më shumë.
Inspektime në qendrat e numërimit
Ndër të tjera Celibashi bëri me dije se janë konstatuar raste kur komisionerët nuk i vlerësojnë votat sipas rregullave të përcaktuara nga KQZ për këtë proces. Për këtë arsye ai tha se, KQZ ka dërguar inspektor pranë atyre qendra numërimesh për të cilat janë bërë denoncimet. Celibashi tha se inspektorët do të shqyrtojnë çdo detaj dhe nuk do të bëhet asnjë tolerim ndaj komisionerëve që kanë shkelur rregulloren. Sakaq, ai garantoi kandidatët se KQZ posedon filmime për çdo KZAZ gjatë numërimit të votave dhe do të bëhet verifikimi për çdo votë. “Në përgjithësi ky proces ka shkuar ashtu sikurse janë përcaktuar rregullat në Kodin Zgjedhor.
Janë raportuar problematika ku anëtarë të grupeve të numërimit dhe komisionerët nuk janë duke i ndjekur ato procedura në lidhje me vlerësimin e fletëve të votimit sipas procedurave të KQZ. Kemi dërguar inspektorë që të bëhen qartësimet e duhura. Gjej rastin të rikonfirmoj se ne nuk do të lejojmë asnjë lloj transformimi të votës nga një kandidat tek një kandidat tjetër. KQZ posedon të gjitha filmimet të bëra në fazën e parë. I ftoj kandidatët për deputetë të ndihen të qetë pasi ekzistojnë të gjitha mundësitë për të verifikuar numrin e votave që merr secili prej tyre”, tha ai.
Ja kur konsiderohet vota e pavlefshme
Celibashi tha se disa prej kandidatëve kanë kërkuar rinumërim për ato vota që janë shpallur të pavlefshme. Ndërsa tha prerë se nuk do të ketë numërim të atyre votave ai bëri një sqarim se kur merret në konsideratë vota për kandidatin dhe kur klasifikohet si e pavlefshme. “Ka pasur disa kërkesa për pamjet filmike nga PD, LSI dhe PS, jemi në proces të vlerësimit të këtyre kërkesave. Ka pasur përpjekje dhe për ato fletë ku është votuar vetëm partia dhe ne kemi kërkuar që mos t’i nënshtrohet rinumërimit. Dhe ua kemi thënë se këtë nuk mund ta bëjnë. Ka pasur edhe shënime për dy kandidatë për të njëjtin subjekt. Këtu duhet të sqaroj se, në rastin e parë për subjektin politik janë të vlefshme, por për kandidatët nuk janë të vlefshme”, tha Celibashi.
