Ilir Meta ka kthyer për rishqyrtim ndryshimet në 10 ligjet e reformës në drejtësi. Edhe pse ndërhyrjet u bënë me kërkesë të vet institucioneve dhe u pranuan nga SHBA-BE, kreu i shtetit ka kthyer në bllok ndryshimet në Kodin Penal, Kodin e Procedurës Penale, ndryshimet në ligjin për SPAK, për Gjykatën Kushtetuese dhe ligjet e tjera.
Para zgjedhjeve, presidenti e paralajmëroi diçka të tillë, pasi po sulmonte shumë ashpër reformën në drejtësi. Por kthimi për rishqyrtim i ndryshimeve në Kodin e Procedurës Penale, ligjin për SPAK dhe atë të Kushtetueses të bëjnë të dyshosh se presidenti ka frikë nga shkarkimi dhe nga hetimi penal. Ndryshimet në ligjin për Gjykatën Kushtetuese kanë një përcaktim interesant, pasi lehtësojnë procedurat e përzgjedhjes së 3 anëtarëve të fundit të Kushtetueses.
Kur të ndodhë kjo ikën Vitore Tusha, njeriu i besuar i presidentit. Momentalisht në Kushtetuese kanë dërguar anëtarët, Kuvendi e Presidenti dhe 3 anëtarë duhet që t’i dërgojë Gjykata e Lartë. Kjo e fundit ka mungesë gjyqtarësh dhe nuk plotëson kuorumin e përzgjedhjes së emrave. Ligji aktual parashikon që duhet të marrin pjesë rreth 14 gjyqtarë që të përzgjidhen kandidatët e Kushtetueses ose më saktë 2/3 e tyre. Por me ndryshimet e fundit, mazhoranca e uli në ½ të anëtarëve këtë përcaktim.
Pra me rreth 10 anëtarë mund të zgjidhen 3 emrat e fundit. Nëse ata zgjidhen, presidenti e humb rolin tij në këtë gjykatë. Aty do të mbeten vetëm Sonila Bejtja si e besuara e tij, pasi Vitore Tusha do të zëvendësohet nga anëtarët e Gjykatës së Lartë. Kjo lëvizje e presidentit dyshohet se ka lidhje edhe me skenarët për shkarkimin e tij. Mazhoranca qeverisëse po synon që ta largojë atë nga detyra dhe në fund do të jetë Kushtetuesja ajo që do të vendosë nëse presidenti duhet shkarkuar apo jo. Por nëse plotësohet me 3 emrat e fundit, shanset që presidenti të ndikojë në vendimmarrje janë minimale. Pra duket se kthimi i ligjeve mund të letë lidhje dhe me këtë proces.
Frika nga hetimi
Edhe nëse mazhoranca nuk e shkarkon dot presidentin, në vitin 2022 ai do të jetë qytetar i thjeshtë si të gjithë. Meta nuk do të jetë as deputet e as ministër, por me shumë gjasë do të bëhet kryetar i LSI. Duke qenë se opozita i humbi zgjedhjet ai do të jetë pa imunitet dhe SPAK do e ketë shumë të lehtë ta hetojë.
Në korridoret e politikës flitet shpesh se Meta mund të jetë zyrtari i parë nga do të nisë reprezalja dhe do ketë shumë zhvillime. Për këto arsye Presidenti ka bllokuar dhe disa ligje të tjera që kanë të bëjnë më luftën antikorrupsion. Meta ka kthyer për rishqyrtim ligjin për SPAK dhe Kodin e Procedurës Penale.
Me ndryshimet në këto ligje, SPAK fokusohet vetëm te korrupsioni në nivele të larta dhe nuk merret më me korrupsionin e policëve apo funksionarëve të tjerë të nivelit të ulët. Presidenti me kthimin në Kuvend të ligjeve duket se ka shtyrë edhe për disa kohë forcimin e SPAK. Po ashtu ai ka bllokuar dhe pagat për hetuesit e BKH.
Në ligjin për organet e luftës antikorrupsion janë përcaktuar nivelet e pagave për stafin e Byrosë Hetimore dhe do të ketë vonesa në këtë aspekt. Por gazeta ka mësuar se mazhoranca do të nisë menjëherë punë për rrëzimin e tyre. Sot Komisioni i Ligjeve do të mblidhet për t’i shqyrtuar dhe me shumë mundësi javën që vjen do të kemi seancë plenare për t’i rrëzuar dekretet dhe duke i hapur rrugë futjes së tyre në fuqi.
