Gjykata e Lartë ka lënë dje në fuqi vendimin për sekuestrimin e pronave të ish-kreut të DIA, Kastriot Ismailaj. Gjatë kohës së qeverisjes Meta-Berisha skandali CEZ-DIA ishte një nga më të rëndët, por i vetmi që përfundoi në burg ishte Ismailaj. Kështu, ditën e djeshme Gjykata e Lartë rrëzoi rekursin e tij për të rimarrë pasurinë mbi rreth 5 milionë euro, duke vendosur mbajtjen nën sekuestrim të kësaj shume.
Kujtojmë këtu se, llogaritë bankare ku janë konfiskuar miliona eurot ishin në emër të Kastriot Ismailajt, nënës Lutfije Ismailaj dhe gruas së tij Vojsavës, si dhe kompanisë ADC, një prej kompanive që ai përdorte për transfertat e parave që merrte nëpërmjet DIA. Ndërkohë, lidhur me këtë çështje gazeta ka kontaktuar dje me juristin Romeo Kara, i cili ishte i pari që denoncoi aferën në fjalë. Juristi tregoi se, Ismailaj nuk ka qenë i vetëm në këtë vjedhje kaq të madhe, por pas tij qëndrojnë njerëz me më shumë post dhe influencë, duke përmendur këtu presidentin Ilir Meta.
Sipas tij, këtë e ka pohuar vetë bashkëshortja e Ismailajt, duke thënë se, Meta ka influencuar Ismailajn për çdo veprim që ai ka kryer dhe në këmbim ka kërkuar 10 milionë dollarë. Romeo Kara përmend si një tjetër dëshmitar të këtij bashkëpunimi edhe ish-drejtorin e DIA, i cili ka thënë se vetë Ismailaj ia ka dorëzuar paratë e kërkuara Metës në shtëpinë e tij.
“Lidhur me këtë situatë dhe si ka punuar ai grup mashtrimi kemi edhe prononcimin e gruas së Ismailajt e cila ka pohuar se: Ismailaj nuk ka qenë i vetëm na këtë aferë, se patjetër që aty janë përfshirë edhe peshq të mëdhenj dhe se Meta është patjetër njeri prej tyre, se Meta i kërkonte Ismailajt qe ai t’i bënte presion CEZ për t’u marrë para pasi ishte Meta që kishte ndikuar tek vendimi i ERE që të favorizonte CEZ, në lidhje me uljen e çmimit te shitjes së energjisë.
Sipas pohimeve të bëra nga ish-drejtori ekzekutiv i DIA-s, Elvis Mataj, Meta kërkonte një shumë prej 10 milionë eurosh. I njëjti person pohon gjithashtu se, Ismailaj i ka çuar personalisht Metës në shtëpi një çantë lëkure ngjyrë kafe plot me para”, u shpreh ai.
Ja çfarë u kurdis në Pragë
Sipas juristit, gjithçka filloi në ditën që Ismailaj dhe Meta shkuan bashkë në Pragë për të takuar drejtuesit e CEZ. Romeo Kara tha se, Meta qëllimisht shmangu praninë e ambasadorit në këtë takim, për të thurur më lehtë planet me CEZ dhe Ismailajn. Fill pas këtij takimi, sipas juristit, ERE miratoi vendimin që KESH t’i shiste CEZ energji me çmim shumë të ulët dhe drejtpërsëdrejti përfitoi DIA, në bazë të marrëveshjes që kishte me CEZ.
“Me 29 nëntor 2010, Meta dhe Ismailaj kanë udhëtuar së bashku për në Pragë duke realizuar takime me drejtuesit më të lartë të CEZ-Group atje. Prania e ambasadorit Tepshi në këto takime është shmangur nëpërmjet një aksidenti të qëllimshëm të makinës së tij. Meta ka ndikuar drejtpërsëdrejti me vajtjen e tij në Pragë që, të lidhej dy muaj më pas marrëveshja e dytë DIA-CEZ, duke dhënë garanci për të ulur çmimin e shitjes së energjisë nga KESH-i tek CEZ-i.
Pikërisht pak ditë pas kthimit nga Praga, ERE miraton me vendim uljen e çmimit të energjisë duke rënduar buxhetin e shtetit minimumi 30 milionë euro në vit. Meta dhe Ismailaj kanë qëndruar në Pragë në Hotel Mandarin Oriental në rrugën Nebovidska”, tha juristi.
Si influencoi Meta
Ndërkohë ai tregon se, që nga ai takim në Pragë saga e mashtrimeve nga CEZ-DIA me kryesues Meta-Ismailaj ka vazhduar, duke përmendur se në 2009 kur filloi mbledhja e borxheve të CEZ, me kërkesë të Metës dhe Berishës u caktua si mbledhës i jashtëm Kastriot Ismailaj, të cilin e kanë prezantuar si aleat të tyre.
Juristi tregoi se, kjo është dëshmi e ish-administratorit të CEZ, i cili ka treguar se pjesa më e madhe e borxheve të mbledhura është përfituar nga DIA. “Më 26 tetor 2014, ish-administratori i CEZ, Jozef Hejsek, ka dëshmuar se: lidhur me mbledhjen e 430 milionë eurove debi të CEZ, Qazim Tepshi, ish ambasadori i Shqipërisë në Pragë, pas diskutimeve me eprorin e tij Ilir Meta, rekomandoi Kastriot Ismailajn si mbledhës të jashtëm të borxheve të CEZ, duke e prezantuar atë si një aleat të ngushte të Metës dhe Berishës. Kjo gjë sipas Hejsekut ka ndodhur ne vjeshtën e vitit 2009.
Nga shuma prej 430 milionë eurosh, 50% te saj do t’i kalonte nëpërmjet DIA-s këtyre personave”, tha Romeo Kara. Duhet theksuar se Kara ka bërë një padi në prokurori për këtë aferë dhe ajo është në duart e SPAK. Ndoshta një ditë edhe mund të hapet.
