Komisioni Hetimor vulos javën që vjen shkarkimin e presidentit Ilir Meta. Socialistët nga nesër e në vijim do organizojnë 4 mbledhje të njëpasnjëshme dhe të enjten e ardhshme raporti për shkarkimin e presidentit do të jetë gati.
Gazeta ka siguruar kalendarin e punës së Komisionit Hetimor, në të cilin sqarohet se mbledhja e radhës do të mbahet nesër, ku do të diskutohet plani final i hetimit. Më pas do të mblidhen sërish me datë 17 maj për të diskutuar mbi pikën për administrimin dhe shqyrtimin e informacioneve, të dhënave, raporteve të marra nga institucionet lidhur me objektin e hetimi.
Me datë 18 presidenti, si objekti nën hetim, do të thirret për një seancë dëgjimore, që do të jetë seanca e fundit dëgjimore sepse me datë 20 do të mblidhen të gjitha të dhënat dhe rezultatet për të paraqitur në atë mbledhje raportin përfundimtar të hetimeve. E enjtja e javës që vjen do të jeta edhe dita që përmbyllen përfundimisht hetimet, që do vulosin kështu shkarkimin e Ilir Metës nga posti i presidentit.
Kujtojmë këtu se, mazhoranca ndërmori hapat për të ngritur këtë Komision Hetimor për shkarkimin e presidentit të vendit nga detyra pas disa përplasjeve të shtrira në kohë mes dhe akuzave në distancë, por ndikuar më së shumti nga deklaratat e Metës gjatë fushatës elektorale. Komisioni është ngritur në bazë të logjikës dhe ligjeve, të cilat ndalojnë autoritetet e vendit të bëjnë thirrje për dhunë dhe stabilitet, aq më pak në kohë zgjedhjesh.
Në këtë kuadër Komisioni ka si objektiv hetimin e veprimtarisë së presidentit Meta e veçanërisht deklaratat e tij, para, gjatë fushatës dhe heshtjes zgjedhore të zgjedhjeve parlamentare të 25 prillit. Presidenti nuk është paraqitur në seancën e parë dëgjimore i thirrur nga Komisioni Hetimor, por nga ana tjetër ka vijuar sërish me akuza dhe sulme ndaj organeve të drejtësisë në vend.
Kritikat ndaj Bashës
Sigurisht që mbështetës të presidentit kanë reaguar kundër këtij komisioni, po ajo që vihet re është se kreu i Partisë Demokratike, Lulzim Basha, nuk ka dalë me asnjë qëndrim publik. Anëtarë të PD kanë hedhur akuza se PS po merret me shkarkimin e Metës, për të larguar vëmendjen nga vjedhjet zgjedhore, por akoma nuk është bërë asnjë deklaratë publike nga radhët e PD që të kundërshtojë shkarkimin e presidentit.
I vetmi që ka reaguar është ish-kryeministri Sali Berisha, i cili është shprehur se Rama kërkon të mbulojë krimet e tij dhe se mazhoranca po shkel Kushtetutën duke u marrë me këtë proces, sepse nuk ka kompetenca. Rrjedhimisht, pas reagimit të Berishës, pritej deklarata e Bashës, por që nuk erdhi. Pikërisht heshtja e Bashës ka bërë që në media dhe në politikë të nisin kritikat ndaj tij. Të parat kanë qenë media që mbështesin politikën e Berishës dhe Metës, ato të cilat kanë vënë vazhdimisht në dukje faktin që Basha nuk ka dhënë asnjë reagim për shkarkimin e presidentit, ndërsa politikanë të shumtë kanë hedhur hipoteza se ai po mban anën e Ramës dhe hesht për Metën.
Kritika më e fundit ndaj liderit të PD ka ardhur nga ish-zëdhënësja e Berishës, Erla Mëhilli, e cila ka deklaruar se Basha po shton dyshimet e një bashkëpunimi me PS. Sipas saj, Basha po tregon që është i dobët për të udhëhequr opozitën. “Ajo që unë e shoh të paqartë është pozicioni që ka PD dhe zoti Basha për shkarkimin e zotit Meta. Nuk e kam dëgjuar deri tani të artikulojë asnjë gjë deri tani lidhur me këtë. Kjo është një gjë e rëndësishme. Kjo është hera e dytë që ngrihet një komision hetimor dhe menjëherë pas zgjedhjeve të përgjithshme dhe unë mendoj se nuk ka gjë më të rëndësishme sesa kjo për një opozitë.
I vetmi që ka artikuluar për këtë është zoti Berisha, po nga zoti Basha nuk ka. Kjo gjë i çon pastaj njerëzit të krijojnë përshtypjen sikur zoti Basha i thotë zotit Rama që hiqe ti se unë kam ca punë më të rëndësishme për të bërë dhe pastaj flasim. Është çështje e rëndësishme dhe kjo tregon që PD nuk ka as orientim as strategji”, u shpreh Mëhilli.
