Partia Socialiste pritet që brenda kësaj jave të mbyllë hetimet për shkarkimin e presidentit Ilir Meta nga detyra. Pas disa mbledhjesh dhe diskutimesh, sot Komisioni Hetimor i ngritur do të hapë dosjet kundër presidentit Meta.
Sipas informacioneve, në tryezën e komisionit hetimor kanë mbërritur informacione nga institucionet ligjzbatuese mbi veprimtarinë dhe deklaratat e bëra nga kreu i shtetit, të cilat tashmë do të hapen nga anëtarët për të mësuar dhe evidentuar shkeljet që mund të ketë kryer presidenti Meta para, gjatë fushatës dhe në ditën e heshtjes zgjedhore sa u takon zgjedhjeve parlamentare të 25 prillit.
Mësohet se dosja e parë që pritet të hapet është ajo që Autoritet i Mediave Audiovizive ka dorëzuar pranë Komisionit Hetimor lidhur me deklaratë dhe thirrjet e bëra nga zoti Meta. Mbledhja e komisionit do të mbahet në orën 13:00, ndërsa mes të tjerash ty do të prezantohet dhe eksperti konstitucionalist Artan Spahiu. “Miratimi i procesverbalit të mbledhjes së datës 14 maj 2021;
Marrja e detyrës nga eksperti ligjor z. Artan Spahiu; Komunikimi i përgjigjeve të institucioneve të tjera dhe prezantim me informacionin e ardhur nga Autoriteti i Mediave Audiovizive; Çështje të tjera”, thuhet në njoftimin e Kuvendit.
Anëtarët pajisen me certifikata sigurie
Por gazeta ka mësuar se pjesë e diskutimeve në Komisionin Hetimor pritet të jenë edhe informacionet top sekret që institucione si Shërbimi Informativ Shtetëror, Prokuroria e Përgjithshme dhe Struktura e Posaçme Kundër Korrupsionit dhe Krimit të Organizuar kanë dorëzuar.
Mësohet se disa anëtarë të Komisionit Hetimor që janë pjesë e Komisionit të Sigurisë kanë certifikata sigurie, ndërkohë që edhe anëtarët e tjerë janë pajisur me certifikata, të cilat sipas ligjit iu lejon që të njihen me informacionet të quajtura ndryshe “top sekret”, që disponohen nga SHISH dhe SPAK, sikundër është rasti që ka të bëjë me veprimtarinë e presidentit Meta.
Pra, burime nga Komisioni Hetimor, theksuan se tashmë anëtarët janë pajisur me certifikata sigurie dhe e kanë të lehtë që të jenë prezentë gjatë kohës që do të hapen informacionet sekrete. Thënë ndryshme mazhoranca tashmë ka hyrë në një fazë që po hap dosjet kundër presidentit Ilir Meta.
Ndërkohë, mbetet të shihet nëse në mbledhjen e komisionit hetimor dhe që do të hapen informacionet top sekret, do të jenë prezent kreu i Shërbimit Informativ Shtetëror, Helidon Bendo dhe drejtori i Policisë së Shtetit, Ardi Veliu, duke qenë se një kërkesë të tillë e artikuloi në mbledhjen e komisionit hetimor, nënkryetari Myslim Murrizi.
Nesër seancë dëgjimore me presidentin
Megjithatë, ndërsa hapja e dosjeve dhe provave që Partia Socialiste ka kundër kreut të shtetit ka rëndësinë e saj, sytë e mbledhjes së Komisionit Hetimor pritet të jenë nesër, ditë kur është thirrur presidenti Ilir Meta për të dëshmuar. Nesër është 18 maj dhe kreu i Komisionit Hetimor, Alket Hyseni pak ditë më parë bëri me dije se në këtë ditë do të thirret për të dëshmuar para anëtarëve dhe parashtruar variantin e tij, presidenti Meta. Kështu që, nisur për nga vëmendja e madhe që ka prania e Metës në komisionin hetimor, mbetet të shihet nëse kreu i shtetit do ta refuzojë seancën dëgjimore dhe Komisionin Hetimor të ngritur për të apo jo.