Dy çështjet më të rëndësishme që ka Kushtetuesja në duar pritet të gjykohen kur kjo gjykatë të ketë 9 anëtarë.
Rasti i zgjedhjeve vendore u shty për në fund të vitit, strategji kjo duke futur në lojë Komisionin e Venecia. Edhe pse ky i fundit e kishte dhënë një opinion mbi shtyrjen e datës së zgjedhjeve nga presidenti, Kushtetuesja i dërgoi 3 pyetje.
Venecia vendos në tetor për këtë rast dhe kjo do të thotë se gjykimi mund të nisë në nëntor. Ndërkohë dosja e dytë dhe më e rëndësishmja është ajo e shkarkimit të presidentit. Kuvendi ka dërguar një raport mjaft voluminoz dhe vendimi që do të marrë Kushtetuesja do të shërbejë precedent për shumë vite me radhë, jo vetëm për Shqipërinë, por dhe për shtete që kanë të njëjtin sistem si ne.
Duke qenë se dhe ky rast është shumë i vështirë, Kushtetuesja ka vendosur të marrë kohë, duke mos caktuar ende një datë se kur do të nisë gjykimi i presidentit. Kushtetuesja ka shfrytëzuar në maksimum afatin 3 mujor që i jep ligji për të vendosur mbi rastin në fjalë.
Si në zgjedhjet vendore ashtu dhe në rastin e presidentit, ekziston rreziku që të mos sigurohen votat e nevojshme, qoftë kundër apo qoftë pro. Nëse kemi një rezultat të votave 4 me 3, atëherë vendimi bëhet nul dhe Meta nuk shkarkohet, si dhe zgjedhjet nuk përsëriten. Për të shmangur gjithë këtë, sipas burimeve gjykata po pret që të jetë e kompletuar me 9 anëtarë. Një burim i tha gazetës se kjo është edhe një kërkesë nga ndërkombëtarët, të cilët duan që sidomos për shkarkimin e presidentit të ketë 9 anëtarë kjo gjykatë.
Topi te KLGJ
Që Kushtetuesja të jetë me 9 anëtarë duhet të kemi një koordinim mes KLGJ, KED dhe Gjykatës së Lartë. Nëse një prej institucioneve zvarrit procedurat, atëherë Kushtetuesja mund të mbetet me emrat aktualë. Sipas ligjit kjo gjykatë ka 9 anëtarë dhe 3 i emëron Kuvendi, 3 Presidenti dhe 3 Gjykata e Lartë.
Kuvendi e Presidenca e kanë ezauruar detyrën dhe tashmë është Gjykata e Lartë që duhet të emërojë 3 emrat fundit. Gara u hap për këto vakanca dhe shfaqën interes 9 persona. Ata tashmë i kanë kaluar Këshillit të Emërimeve në Drejtësi, i cili në fund vendos kush kualifikohet dhe kush jo. Por edhe sikur KED ta mbyllë në kohë rekord punën, Gjykata e Lartë nuk i emëron dot 3 emrat e saj sepse nuk ka kuorum.
Sipas ligjit, Gjykata e Lartë duhet të ketë të paktën gjysmën e anëtarëve të saj për të bërë mbledhjen ku do hidhen në votim emrat. Pra duhet të ketë 10 anëtarë. Momentalisht kjo gjykatë ka 9 anëtarë dhe i duhet edhe një emër. Tashmë është Këshilli i Lartë Gjyqësor ai i cili duhet të bëjë përzgjedhjen e tij dhe ta dërgojë në Presidencë. Sipas burimeve edhe nëse nuk mbyllet në gusht ky proces, në shtator gjithçka do jetë gati. Pra shpresat janë që në momentin që KED të ketë emrat, Gjykata e Lartë të ketë 10 anëtarë dhe të bëhet plotësimi i Kushtetueses.
