Në një kohë kur SPAK ka nisur fushatën e “spastrimit” të administratës qëndrore apo asaj vendore të personave të korruptuar, në rrjetën e të cilës kanë rënë kryebashkiak, ish. zv ministra apo zyrtarë të lartë, ka dhe nga ata që nuk bëjnë prapa dhe as që e marrin mundimin të “lëvizin nga istikami” kur bëhet fjalë për të shpërdoruar paratë publike.
E tillë është Agjencia e Parkut dhe e Rekreacionit, e drejtuar nga Erinda Fino, e cila mësohet se vetëm përgjatë periudhës 11 Janar deri më 2 Qershor 2021, rezulton sipas një raporti të “Open Procurement”, të ketë probleme me 13 tendera që kapin shifrën 52.151.040 lekë (ose 425 mijë euro).
Të gjitha këto tendera janë raportuar me “red flag” (flamur të kuq), që nënkupton se prokurimi ka një ekspozim apo rrezik për sjellje të papajtueshme me ligjin, kryesisht në lidhje me mos zbatimin e ligjeve antikorrupsion.
Këto tendera janë klasifikuar me flamur të kuq për dy arsye, “Mungesë konkurrence” dhe “Skualifikim i të gjithë operatorëve konkurrues veç fituesit”.
Përkatësisht janë 8 tendera të klasifikuar “Mungesë e konkurrencës”, që do të thotë se: Prokurimi zhvillohet me një konkurrent të vetëm, ku shpesh këto procedura më shumë se sa mungesë konkurrence nga tregu, shfaqin mundësi të formulimit të kritereve dhe afateve për dorëzimin e dokumentave në favor të një kompanie të paramenduar klienteliste.
Ndërsa 5 tenderat e tjerë mbajnë shënimin “Skualifikim i të gjithë operatorëve konkurrues veç fituesit”, që do të thotë se: Autoriteti Prokurues ka skualifikuar të gjithë operatorët pjesëmarrës në garë me ofertë më të ulët, se oferta fituese.
Në kohën kur Kryebashkiaku i Lushnjës Fatos Tushe, u arrestua për shkelje të barazisë në tendera, se kishte favorizuar një kompani që do kryente rehabilitimin e një kanali vaditës me vlerë 24 milion lekë, kurse ish zv. Ministrja Rovena Voda, për një aparat celular dhe një arkë me peshk, Erinda Fino është një “peshk” më i madh se dy ish kolegët e saj, jo për nga rëndësia e pozicionit, por për nga pozita e shpërdorimit të parave publike, ku vetëm në 6 muaj Agjencia e Parkut dhe e Rekreacionit e drejtuar prej saj, shfaq 13 tendera me probleme për dhënie tenderi në kompani të paramenduara klienteliste.
Ekskluzive.al do vazhdoj misionin e tij për publikimin e të gjitha raporteve për tenderat publik që shfaqin probleme dhe të pushtetarëve të korruptuar, që nuk e ndalin grykësinë e tyre ndaj parave të taksapaguesve shqiptarë. Po deri atëherë, a duhet SPAK të mësyj në Bashkinë e Tiranës?/Ekskluzive.al
Mëposhtë në foto janë të 13 tenderat me “flamur të kuq” të raportuara nga “Open Procurement”:
