Reforma në drejtësi vijon të mbajë në ankth politikën shqiptare. Edhe pse u votua me 140 vota Kushtetuta e re, është shumë i madh numri i politikanëve që nuk e duan këtë proces, pavarësisht qëndrimeve të tyre publike.
Në 5 vite kjo reformë ka hasur në shumë pengesa dhe tentativa për ta kapur atë. Sinjalet janë se shumë pushtetarë vijojnë të njëjtën rrugë edhe tani që flasim. Vërtet reforma ka dhënë shumë efekte, por kemi shumë gjykata e prokurori me staf të reduktuar.
Gjykata e Lartë dhe ajo Kushtetuese janë dy organet më problematike, pasi aty ka çështje shumë të rëndësishme. Kushtetuesja është me 7 anëtarë dhe nuk po plotësohet dot me 9. Ndërkohë Gjykata e Lartë nga 19 që duhet të ketë, ka vetëm 9. Por edhe pse KLGJ ka punuar gjithë këto vite për t’i bërë funksionale, mësohet se në prapaskenë po bëhet një luftë mjaft e fort që ky proces të mos ecë si duhet.
Politika nuk do një Gjykatë të Lartë dhe Kushtetuese funksionale. Duke qenë se të dyja gjykatat janë të lidhura, duket se kjo po përdoret nga armiqtë e reformës. Sipas ligjit, 3 anëtarët e fundit të Kushtetueses duhet t’i emërojë Gjykata e Lartë.
Por që kjo e fundi ta bëjë këtë gjë, duhet që të ketë minimumi 10 anëtarë. Pra mungesa e një anëtari në Gjykatën e Lartë, mban peng Gjykatën Kushtetuese. Kjo e fundit ka dy dosje shumë të rëndësishme politike. E para është ajo e zgjedhjeve vendore dhe e dyta ajo e shkarkimi të presidentit. Nëse emërohen 3 emrat e fundit mund të kemi një vendim ndryshe dhe palët e interesuara po lobojnë që gjithçka të mbet e bllokuar.
Padia ndaj KLGJ
Gazeta “Sot” u interesua pranë Gjykatës së Lartë për të mësuar se përse nuk po emërohet anëtari i 10 i saj. Sipas ligjit, Gjykata e Lartë duhet që të emërojë edhe një anëtar nga radhët e juristëve, pra nga jashtë sistemit, por kjo gjë nuk po ndodh. Sipas informacioneve të marra, arsyeja është sepse një prej kandidatëve të skualifkuar, më konkretisht Kestrin Katro ka ndjekur rrugën ligjore, duke kundërshtuar vendimin e KLGJ.
Sipas të dhënave të siguruar nga gazeta, Katro ka kandiduar për të qenë pjesë e Gjykatës së Lartë për vakancat nga jashtë sistemit. Me vendimin nr. 41, datë 23.01.2020 KLGJ rezulton të ketë vendosur skualifikimin e kandidates jogjyqtare dhe përjashtimin e saj nga kandidimi për emërimin si gjyqtare në Gjykatën e Lartë. Më pas ajo i është drejtuar Gjykatës Administrative të Apelit, duke kërkuar prishjen e vendimit të Këshillit të Lartë Gjyqësor.
Kjo e fundit nuk e ka pranuar padinë dhe më pas çështja ka shkuar në Gjykatën e Lartë ku është kërkuar: 1. Pezullimi i ekzekutimit të vendimit nr. 32, datë 21.02.2020 të Gjykatës Administrative të Apelit; Sigurimin e objektit të padisë, duke u vendosur pezullimi i procedurave nga Këshilli i Lartë Gjyqësor për pozicionin e anëtarit të Gjykatës së Lartë, nga radhët e juristëve jogjyqtarë. Më datë 27.05.2021 Gjykata e Lartë në Dhomë Këshillimi e ka refuzuar këtë kërkesë.
Megjithatë mësohet se betejat gjyqësore vijojnë dhe sipas informacioneve kjo është arsyeja se përse nuk po emërohet anëtari i fundit. Mësohet gjithashtu se kandidati i kualifikuar është Dariel Sina, por emërimi tij po mbahet pezull dirisa atë mbyllen proceset gjyqësore.
