Politika shqiptare ka përkujtuar ditën e djeshme vrasjen e Azem Hajdarit. 23 vite më parë, ai u ekzekutua me një breshëri plumbash përpara selisë së Partisë Demokratike, ndërkohë që gjyqi për autorët vijon ende edhe sot.
Në shenjë nderimi ndaj figurës së Azem Hajdarit, drejtuesit demokrat së bashku me kreun e PD, Lulzim Basha kanë kryer homazhe në Memorialin e liderit të Lëvizjes Studentore teksa kanë vendosur edhe kurora me lule. Me anë të një mesazhi Basha u shpreh se Azem Hajdari ishte lideri, i cili vrau frikën e shqiptarëve dhe ndezi shpirtrat e tyre për liri dhe demokraci. Sipas kreut demokrat, vepra dhe sakrificat e Azem Hajdarit janë një model frymëzimi për të mos iu nënshtruar regjimeve të dhunës.
“Sot, si çdo 12 shtator, përkujtojmë liderin e Lëvizjes Studentore, njeriun që ndezi shpirtrat dhe vrau frikën e shqiptarëve anembanë vendit për liri dhe demokraci, të paharrueshmin Azem Hajdari.
Vepra dhe sakrifica e Azem Hajdarit mbetet model frymëzimi për të mos iu nënshtruar dhunës së regjimit dhe për të çuar deri në fund idealin e Shqipërisë si gjithë Europa”, tha ai. Po ashtu në përkujtim të vdekjes së Azem Hajdarit ka reaguar edhe presidenti i vendit, Ilir Meta.
Me një mesazh në rrjete sociale, presidenti shprehet se energjia dhe guximi i Azem Hajdarit duhet të jetë një shembull që frymëzon përpjekjet për ta bërë vendin si gjithë Europa. “Nderim, respekt dhe mirënjohje ndaj veprës së përjetshme të Azem Hajdarit, udhëheqësit të Lëvizjes Studentore, që solli pluralizmin politik dhe demokracinë. Energjia dhe guximi i tij duhet të frymëzojnë përpjekjet tona për një Shqipëri si gjithë Europa”, tha ai.
Reagon Rudina Hajdari
Ish-deputetja Rudina Hajdari po ashtu me anë të një mesazhi në rrjete sociale ka reaguar ndaj përkujtimit të të atit të saj. Hajdari u shpreh se babai i saj ishte një njeri luftarak, guximtar e ëndërrimtar dhe këto veti sipas saj nuk janë më në politikën e sotme. Ish-deputetja tha se ëndrra e babait të saj ishte një Shqipëri e lirë dhe demokratike me besim e pa frikë.
Sipas saj kjo ëndërr sot nuk është realizuar, por nëse Azem Hajdari do të ishte gjallë, duke luftuar për këtë ai do të ndryshonte rrjedhën e historisë. “Azemi ishte luftarak, idealist, guximtar dhe ëndërrimtar. Veti këto të cilat nuk i kemi parë më në skenën politike shqiptare. Ëndrra e tij ishte një Shqipëri e lirë dhe demokratike, ku njerëzit e ndërtojnë jetën e tyre me besim e pa frikë. Fatkeqësisht kjo ëndërr ende nuk është bërë realitet.
Nëse Azemi do të ishte sot mes nesh, do të luftonte pikërisht për këtë. Në fakt energjia dhe kurajo e tij me siguri do ta kishin ndryshuar rrjedhën e historisë”, u shpreh ajo. Teksa përkujtohet vdekja e Azem Hajdarit, në Gjykatën e Tiranës pritet të zhvillohet procesi për Izet Haxhinë, i dyshuar për përfshirje në këtë ngjarje. Ky proces ka qenë i bllokuar, por sipas burimeve do të zhbllokohet tani në shtator ku ndoshta dhe do të hidhet dritë mbi vdekjen e ish-deputetit.
