Qeveria duket se po shkon te vaksinimi me detyrim për të gjithë popullatën, teksa fillimisht u tentua vaksinimi me detyrim i studentëve, dje janë dhënë sinjale se do të ketë sanksione ndaj qytetarëve që nuk janë vaksinuar.
Ishte ministrja e Shëndetësisë, Ogerta Manastirliu ajo e cila deklaroi në Kuvend se mund të mos lejohet më futja në bare, restorante dhe ambiente të mbyllura e qytetarëve të pavaksinuar. “Si hyhet në një lokal në Europë? Si shkohet në strukturat e shërbimit? Do ta vendosim pasaportën e vaksinimit”, tha ajo. Por pse qeveria këmbëngul te vaksinimi me detyrim?
A janë vërtet zgjidhje pasaportat e gjelbra? Nëse shohim shembujt që vijnë nga shtetet e tjera, por dhe ajo që ndodh në vendin tonë, pasaportat e vaksinimit më shumë po kthehen në bomba infektimi sesa masa parandalimi. Në lokale, stadiume, kinema, autobusë, në teatro dhe vende të tjera do lejohen vetëm të vaksinuarit.
Por teksa momentalisht ka numër të kufizuar, kur të vihet në zbatim plani nuk do ketë kufizim për të vaksinuarit dhe kinematë, stadiumet dhe çdo gjë tjetër do mbushen plot. Por a do të thotë kjo se nuk do të ketë infektime? Prodhuesit e vaksinave dhe mjekët shprehen se vaksina nuk të mbron nga infektimi. Sipas tyre, ajo mund të ulë efektin vdekjeprurës të virusit, por nuk do të thotë se një i vaksinuar nuk mund të infektohet.
Pra edhe një person me pasaportë vaksinimi mund të kthehet në burim infektimi. Atëherë, këto pasaporta do kthen në bomba të ligjshme infektimi. Një person i vaksinuar nuk do ketë kufizim edhe pse ai mund të jetë i infektuar. Shumë të tjerë mund të mos tregojnë se janë infektuar dhe justifikohen se janë të vaksinuar. Pra shanset që të kemi një situatë akoma dhe më të rëndë janë të mëdha.
Shembujt nga jashtë
Shembujt më të mëdhenj vijnë nga jashtë. Izraeli ishte shteti i cili vaksinoi pjesën dërrmuese të popullatës me “Pfizer”, vaksina që rrit më shumë numrin e antitrupave. Deri pak javë më parë, Izraeli ishte në numër rekord infektimesh. Nga të dhënat e djeshme, rezulton se Britania ka pasur mbi 37 mijë infektime të reja, edhe pse është ndër shtetet më të vaksinuara.
Në Turqi, ka pasur 29 mijë të infektuar ditën e djeshme. Edhe ky shtet është ndër më të vaksinuarit. Gjermania është shteti i radhës, ku vetëm dje pati 25 mijë të infektuar. Po ashtu dhe në shtete si Austria, Belgjika e Ukraina niveli i infektimeve është shumë i lartë.
Kjo tregon se vaksina nuk ndal infektimet. Në Shqipëri ka shumë raste kur qytetarët e vaksinuar janë infektuar, madje disa dhe me simptoma të rënda, pa përmendur këtu se shumë individë që janë vaksinuar kanë pasur komplikacione. Pra pyetja është: A sjell zgjidhje pasaporta e vaksinimit? Sinjalet janë që jo dhe sipas studimeve imuniteti natyral është më i miri. Të mos harrojmë se në një vend si Shqipëria, shanset që të rritet korrupsioni me të tilla pasaporta janë të mëdha. Shembulli më i fundit ishte ai i studentëve, ku dështoi si projekt.
Misteret e kontratës dhe këmbëngulja e qeverisë
Qeveri ka futur dozën e tretë të vaksinimit dhe tashmë publiku po orientohet te vaksina “Pfizer”. Dje u miratua kontrata e radhës me kompaninë, por nuk dihet se çfarë ka kjo kontratë. Shqipëria dhe shumë shtete të tjera kanë pranuar të mbajnë konfidenciale kushtet e marrëveshjes. Ky veprim normalisht që nxit teoritë konspirative se ka diçka që nuk shkon me këtë vaksinë. Kemi të bëjmë me shëndetin e qytetarëve dhe nuk mund të ketë një marrëveshje të fshehtë. Disa eurodeputetë kanë kërkuar kontratën edhe nga Parlamenti Europian dhe ajo u është refuzuar, duke i informuar pjesërisht.
Skandalet në laboratorë
Ndërkohë shumë persona tregojnë se mënyra se si u krijuan vaksinat nuk është e duhura. “British Medical Journal”, në një shkrim ka treguar se çfarë ka ndodhur në laboratorët që punonin me Pfizer.
“Një drejtor rajonal i cili ishte i punësuar në organizatën kërkimore “Ventavia Research Group” tha për BMJ se kompania falsifikoi të dhënat, zbuloi pacientë, përdori vaksinues të patrajnuar si duhet dhe anashkaloi efektet anësore të vaksinës. Stafi që kryente kontrollet e cilësisë ishte i mbingarkuar nga numri i madh i problemeve që dilnin rrugës. Pasi e informoi vazhdimisht Ventavia-n për këto çështje, drejtori rajonal, Brook Jackson, i dërgoi një ankesë me email Administratës së Ushqimit dhe Barnave të SHBA-së (FDA).
Ventavia e pushoi nga puna në të njëjtën ditë”, thuhet në artikull. Zyrtari në fjalë ka treguar me detaje problemet që ndodhin aty, nga anashkalimi i efekteve anësore dhe mostrajtimi i tyre te pacientët. Etiketimi gabim i mostrave dhe mosruajtja e vaksinave në kushte e duhura. Të gjitha këto ngrenë pyetjet: Sa të sigurta janë vaksinat? Pse fshihen kontratat me “Pfizer” dhe a ka vërtet efekt pasaporta e gjelbër?
