Vijojnë të thellohen debatet në Partinë Demokratike sa i takon mbledhjes së Kuvendit Kombëtar. Ish-kryeministri Sali Berisha ka deklaruar se ka mbledhur 4200 firma, por deri më sot askush nuk e di sa reale janë dhe kush ka firmosur.
Të enjten kreu i Këshillit Kombëtar, Edi Paloka njoftoi se do të publikonte firmat e mbledhura, por në fakt nuk ndodhi një gjë e tillë. Ditën e djeshme, Paloka ftoi gazetarët për të hapur kasafortën dhe për të treguar firmat e mbledhura.
Por emrat e delegatëve u mbuluan së bashku me të dhënat e tyre, duke mos qenë kështu transparent me publikun. Paloka tha se formularët janë plotësuar nga delegatët e Kuvendit me të gjitha të dhënat që përfshijnë emrin, mbiemrin, emrin e babait, numrin e kartës së identitetit dhe funksionin në parti.
Sipas tij, emrat nuk mund të verifikoheshin as nga gazetarët dhe nga as vetë Paloka pasi kjo është detyra e komisionit të verifikimit. Duket se kjo është e gjitha një strategji për të shkaktuar konflikt brenda Partisë Demokratike dhe çuar vendin drejt destabilizimit.
Shkarkimi i Bashës paqësisht nuk i jep “ushqim” më Berishës pas 11 dhjetorit dhe loja me firmat duket se është një lëvizje për të shkaktuar destabilizim në vend. Më 11 dhjetor mund të zyrtarizohet shkarkimi i Bashës, por teksa ky i fundit nuk njeh asnjë vendim, mund të kemi një konflikt mes palëve.
Në korridoret e politikës po flitet gjatë se Berisha do të sulmojë selinë e Partisë Demokratike dhe të largojë me dhunë Bashën. Duke fshehur firmat duket se po shkohet drejt një skenari të tillë.
Reagon Sekretari i Përgjithshëm i PD
Nga ana tjetër Sekretari i Përgjithshëm i Partisë Demokratike, Gazment Bardhi reagoi menjëherë ndaj deklaratës së Palokës. Në një komunikim për mediat ai u shpreh se po vijon procesi i talljes me demokratët. Bardhi tha se vullneti i demokratëve nuk mund të mbyllet në kasafortë dhe nuk mund të bëhet një shou me të.
Sekretari i PD ripërsëriti thirrjen e tij që firmat të nxirren nga kasaforta dhe të dorëzohet kërkesa në protokollin e PD. Sipas tij, partia nuk është celulë dhe nuk mund të veprojë në ilegalitet. “Jam sot edhe një herë për të shprehur shqetësimin e thellë me vijimin e talljes me demokratë. Ju sot jeni bërë pa dëshirën tuaj dëshmitarë se si po vijohet me një proces të talljes dhe fyerjes së çdo anëtari të PD.
Është tallur edhe me atë pakicë së kanë besuar te lëvizja e zotit Berisha. Edhe sikur të jetë siluruara 1/10 e firmave vullneti i tyre nuk mbyllet dot në kasafortë dhe nuk bëhet shou me vullnetin e demokratëve. Edhe nëse 1/10 e delegatëve të kuvendit kanë firmosur zëri i tyre duhet të dëgjohet nga institucionet e partisë. Dua të ripërsëris thirrjen time që të nxirren firmat nga kasaforta, mos bëni shou, dorëzoni kërkesën në protokollin e PD, respektoni institucionet. PD nuk vepron në ilegalitetit, nuk fshihet dhe nuk është celulë”, tha Bardhi. /NGA ALEKSANDRA HOXHAJ/
