Nga Anri Bala
“Krenar” por të dhjerë… deri në grykë nga krenaria, “mbrojtësit” e kauzave të popullit, po dalin një nga një prej “strofullës” ku janë zhytur, se muret po u krisen e nga frika mos t’i zërë brenda, kanë dal rrugëve, për tu mbushur mendjen njerëzisë, por edhe vetes, se ne nuk kuptojmë “shqip”… si ata dhe as nuk na shohin sytë, e se tashmë gjithçka është e vërtetuar, e ne duhet t’i bashkohemi atyre nën marshin revolucionar që të ngre qimet e …: T’i hedhim, t’i hedhim, t’i hedhim qelbësirat!
Në fakt, unë s’kam asnjë ngut, po pres të shoh kush janë qelbësirat, viktimat e qelbësirave, trafikantët dhe heronjtë! Në këtë histori, ku faji nuk mund të ngelet “jetim” e nëse drejtësia funksionon, shumë shpejt do të kuptojmë kush janë trafikantët e vërtetë, ata të rrenave që i shesin si mall pazari, ata të poshtërsive, që kërkojnë për të na i bërë të pamundur të gjitha aspiratat që kemi, qofshin këto tonat apo dhe ato europiane, se ata të hashashit e kanë pranuar vetë, edhe nuk kam ndonjë kuriozitet për të shuar!
Në gjykimin tim, disa i “kanë hyrë detit në këmbë”, e pasi bënë disa hapa, tani që u ka ardhur “uji në grykë”, po kuptojnë se po mbyten, nga marrëzia që krijuan vetë. Ata janë të poshtër, por për fatin tonë të mirë dhe injorantë, pasi dështojnë në çdo poshtërsi që bëjnë, duke dalë gjithmonë e më cullak tek “hallexhiu”, i cili është rrahur me vaj e me uthull, para se këta kodosh ligjvënës, që e mbajnë veten për të zgjuar… tentojnë ta tallin.
Por ama, ta dini, se jabanxhinjtë që na vështrojnë, nuk ja presin hiç nga këto punë! Jo sepse janë të paditur, e as që dyshojnë, që një deputet i një vendi europian, i votuar nga mijëra njerëz, mund të arrij në këtë lloj intrige, për t’i bërë dëm vendit të tij, duke vrarë me një gurë dy zogj: reformat e shtetarit dhe aspiratat e qytetarit!
Ndaj, ata vazhdojnë të lëshojnë thirrje, e çiren, se: “i gjithë shteti është në këmbë, për t’i bërë presion dëshmitarit dhe gazetarit, për të mbrojtur “trafikantin”, por në fakt, shteti me apo padashje, këtë s’di ta them… është në këmbë për të mbrojtur “viktimën”! E kështu si vajtën gjërat, viktima këtu është PD, ku përveç ca kokrrave brenda partisë, të gjithë po i paragjykojnë, akuzojnë, intimidojnë se ata po gënjejnë ditën për diell!
Vetëm ta mendosh, se ka gënjyer dhe po vazhdon të mashtroj turmat, që ta ndjekin dhe protestojnë me të, për një kauz që nuk ekziston, do ishte një dëm i tmerrshëm dhe i pariparueshëm për të mos thënë një vetvrasje e saj! Ndaj them, se PD-ja është viktima… që duhet të pastrohet, sepse po na duket sikur i ka rënë hija e vdekjes dhe po pret vetëm varrmihësin, e që nëse e ka genjyer edhe atë, do ngeli e vdekur dhe e pakallur.
Bëni mirë të luftoni për të vërtetën, që edhe sikur të jetë e gënjeshtër, nuk bëhet qameti se do ikin në burg tre Babole dhe një Babale, që e ka si kamp pushimi! Pastaj, çfarë faji ka partia, që e mashtruan, por ama ka merita… se lufton për të vërtetën?!
Lulzim Basha, nëse nuk i druhet të vërtetës, duhet ta kërkojë atë, edhe me dhunë madje! Duhet të dal pa u ngjirur e të bërtas: Drejtësi, drejtësi! Ai druhet ta thërras, edhe duke bërë gjoja se po e kërkon i shkreti, nga frika se po i shfaqet, edhe ku të futet pastaj…!
Ata që më dhimbsen nga gjithë kjo histori, janë Babalja dhe gazetari, të cilët janë viktimat e vërtetë të kësaj intrige, dikujt duke i shfrytëzuar varfërinë dhe ëndrrën për azil, e dikujt premtimet dhe pasurinë, për të shpëtuar veten nga gjykimi. Ndaj, shpresoj që mos t’i groposni thellë, si shumë dëshmitarë të partisë dhe udhëheqësit tuaj, që nuk u gjendet as varri, për tu hedhur një grumbull ferra!/Ekskluzive.al
