Teksa po afron 18 dhjetori, janë shtuar tensionet dhe përplasjet në Partinë Demokratike. Ditën e djeshme përfaqësuesit e Komisioni të Rithemelimit u dërguan sërish nga ish-kryeministri Sali Berisha në seli ku pati tensione. Albana Vokshi, Evi Kokalari, Mimoza Hajdarmataj dhe Edith Harxhi shkuan në selinë e PD për të zhvilluar mbledhjen e LDG.
Vokshi u shpreh se i kanë ndërruar bravën e zyrës dhe çdo informacion dhe dokument i LDG ndodhej atje. Deputetja tha se ky veprim i dhunshëm është bërë pa dijeni teksa shtoi se këto struktura janë të pavarura nga lidershipi i PD. “Shpërthimi i dyerve të LDG dhe ka zëvendësuar bravat.
Në këtë zyrë ndodhet një pjesë jo e vogël e historisë së LDG. Çdo informacion dhe dokument zyrtar e origjinal, nuk po flas për sendet e mia personale. Ky veprim është bërë pa dijeninë tonë, veprim i dhunshëm, uzurpues, jo qytetar, jo dinjitoz. Janë të pavarura nga strukturat dhe lidershipi i PD”, tha Vokshi.
Kokalari përplaset fizikisht me një mbështetëse të Bashës
Pasi ka përfunduar takimi i Vokshit së bashku me anëtaret LDG-së, kanë qenë disa simpatizante të Bashës në korridoret e PD që kanë kundërshtuar Vokshin duke i thënë asaj që mandati i saj ka përfunduar. Po ashtu situata u tensionua dhe më shumë ku një prej tyre nuk e ka lejuar Kokalarin të flasë duke e prekur edhe fizikisht.
Aktivistja i është kthyer duke i kërkuar të mos e prekë dhe në një moment gati sa nuk filloi dhe një sherr fizik mes tyre, por ndërhyrja e personave prezentë e pengoi një gjë të tillë. Kokalari ka akuzuar kreun demokrat Lulzim Basha për ushtrim dhune verbale. Ajo u shpreh se pavarësisht dhunës, puna e Komisionit të Rithemelimit do të vijojë në terren dhe nëpër rrethe.
“Do të vazhdojmë punën, do të jemi në terren nëpër rrethe. Pavarësisht nga dhuna verbale. Lulzim Basha duhet të mbajë përgjegjësi për këtë dhunë. Këta që i dërgon ai, kjo është dhunë verbale. Kanë mbyllur të gjitha dyert dhe nuk arrijnë të kontrollojnë dy gra që janë apo jo me probleme. Kjo është e turpshme. Kjo është ndërtesa e Partisë Demokratike. Kjo është kryetarja e Forumit të Gruas për 8 vite”, u shpreh ajo.
Ndërkohë mbështetësja e Bashës ka vijuar me sulmet ndaj Kokalarit duke e përzënë atë nga oborri i selisë. “Kush të ka paguar ty sa rrugë ke bërë Amerikë-Shqipëri, kush t’i ka paguar pse mashtron, mashtruese. Ik, mos të shoh më këtu”, iu drejtua mbështetësja e Bashës, Kokalarit.
Lidhur me këtë reagoi edhe deputetja Vokshi e cila u shpreh se Basha me këto që po përdor nuk mund ta ndalë dot vullnetin e demokratëve teksa shtoi se kjo ishte vetëm mbledhja e parë por në ditët në vijim do të ketë organizimin akoma dhe më të mirë për mbledhjet e LDG.
“Ju e shikoni çfarë po përdor Lulzim Basha. Ta dini që vullnetin e demokratëve askush nuk e ndal dot. Kemi bërë vetëm mbledhjen e parë, do vijojmë për organizimin më të mirë. Asgjë nuk na ndal. Është selia jonë. Është shtëpia e demokratëve nuk është shtëpia e Bashës”, u shpreh deputetja.
Ndërkohë Komisioni i Rithemelimit të PD-së çoi dje në gjykatë ndryshimet statutore të miratuara në Kuvendin kombëtar të 11 dhjetorit. Një nga ndryshimet kryesore që u miratuan në statutin e ri është dhe neni që kryetari i partisë lë mandatin menjëherë nëse humb zgjedhjet parlamentare dhe votëbesohet nëse humb zgjedhjet vendore. Çështja është regjistruar dhe pritet të hidhet në short.
Berisha urdhëron krerët e shkarkuar të degëve të mos lirojnë zyrat
Nga ana tjetër Berisha duket se po përpiqet shumë për të krijuar trazira pasi sipas burimeve ish-kryeministri ka urdhëruar 11 krerët e degëve të cilat u shkarkuan nga Basha që të mos lënë zyrat. Këtë e ka përforcuar dega 9 e PD në Tiranë e cila me anë të një njoftimi është shprehur se nuk e njohin vendimin e një kryetari të shkarkuar por njohin vetëm vendimet nga Komisioni i Rithemelimit të PD. “Nuk njoh dhe nuk pranoj dorëzimin e detyrës te asnjë që është i shkarkuar nga Kuvendi Kombëtar. Njoh si autoritet të vetëm Komisionin e Rithemelimit te PD. Jemi në kulmin e punës për organizimin e referendumit dhe nuk do të tradhtojmë vullnetin dhe misionin që na ka ngarkuar Kuvendi Kombëtar”, thuhej në njoftim./SOT
