Të arrestuarit nga policia për skandalin e pagërrjedhjes mësohet se janë dy specialistë IT të drejtorisë së tatimeve Eni Qirjako dhe Andi Agaraj dhe dy përmbaruesit Endri Ikonomi dhe Klodian Sota.
Databaza me të dhënat personale dhe pagat e mbi 600 mijë qytetarëve shqiptarë, mund të jenë përdorur për ngritjen e një skeme manipulimi dhe mashtrimi me kreditë.
Kjo është një prej pistave që po heton Prokuroria e Tiranës, ku ndër të tjera, dyshohet se të dhënat janë shitur në treg të zi.
Dy personat e dyshuar si të përfshirë në këtë skemë janë Klodian Sota pronar i një zyre mbledhjeje kredish dhe Endri Ikonomi si bashkëpronar i një institucioni mikrokredish.
Dyshohet se ata e kanë qarkulluar listën e pagave mes njëri-tjetrit. Sota dyshohet se e ka shfrytëzuar për të identifikuar emrat me kredi problematike në bankat e nivelit të dytë dhe institucione të tjera financiare dhe nivelet e tyre të pagave.
Ka dyshime se pasi identifikoheshin kredimarrësit problematikë në këto lista, Klodian Sota i adresonte te institucioni i mikrokredisë së Endri Ikonomit për t’i zgjidhur problemin, por Ikonomi, sipas dyshimeve edhe të prokurorisë u ofronte një kredi të re shpesh me kushte të njëjta për të shlyer kredinë e vjetër.
Nga informacionet e deritanishme, nuk ka ende një shifër zyrtare se sa janë qytetarët që kanë rënë pre e kësaj skeme manipulimi. Deri më tani, prokuroria thotë se ka zbardhur skemën se si këto të dhëna kanë dalë në publik.
Sipas prokurorisë, punonjësja e Agjencisë Kombëtare të Shoqërisë së Informacionit, Eni Qirjako ja ka kaluar me email kolegut Andi Agaraj, të dy të arrestuar me urdhër të organit të akuzës. Agaraj më pas këto të dhëna dyshohet se ja ka shitur për 20 mijë deri në 30 mijë lek përmbaruesit Klodian Sota, ndërsa Sota më pas ja ka shitur po me këtë vlerë shtetasit Endri Ikonomi.
Në foto të arrestuarit:
1. Endri Ikonomi
2. Klodian Sota
3. Andi Agaraj
4. Eni Qirjako
