Kreu i Partisë Demokratike, Lulzim Basha ka përjashtuar nga PD-ja ish-kryeministrin Sali Berisha, duke i dhënë kështu edhe një goditjet të fortë “Foltores” së tij.
Pasi e përjashtoi nga grupi parlamentar demokrat dhe funksionet në Partinë Demorkatike, këtë të martë zoti Basha i ka hequr edhe kartën e anëtarësisë zotit Berisha. Ka qenë Kryesia e PD, e cila pas thuajse 8 orësh mbledhje maratonë, mëngjesin e djeshëm ka dalë me një vendim unifikues ku ka shpartalluar “Foltoren”.
Më konkretisht në vendimin e Kryesisë të shpërndarë për mediat nga selia blu dhe që gazeta “SOT” e ka siguruar të plotë, është vendosur që ish-kryeministri Berisha dhe 8 mbështetës të tij, të udhëhequr nga 3 deputetët Flamur Noka, Albana Vokshi, Edmond Spaho dhe ish-president Bujar Nishani të përjashtohen përjetësisht nga Partia Demokratike.
“Përjashtimin nga Partia Demokratike, dhe ku është rasti nga të gjitha funksionet drejtuese dhe nga Grupi Parlamentar i Partisë Demokratike, të anëtarëve që kanë organizuar, nxitur, urdhëruar apo ushtruar dhunë si më poshtë: Sali Berisha, Flamur Noka, Edmond Spaho, Albana Vokshi, Bujar Nishani, Arben Ristani, Rigels Muçollari, Keltis Kruja dhe Klevis Balliu”, thuhet në njoftim.
Pezullohen si anëtarë të PD edhe 19 të tjerë
Por përveç ish-kryeministrit Sali Berisha dhe 8 mbështetësve të tij, Kryesia e PD ka vendosur me votë unanime pezullimin me efekt të menjëhershëm nga anëtarësia në Partinë Demokratike të 19 personave, ndërsa theksohet se ky vendim do t’i pezullojë atë edhe nga funksionet drejtuese. Sipas vendimit të Kryesisë, mes emrave që janë pezulluar dhe që iu kërkohet të reflektojnë, në mënyrë që vendimi të mos ashpërsohet, janë deputetët Luan Baçi, Edi Paloka, Belind Këlliçi, Agron Shehaj, Oerd Bylykbashi dhe Tritan Shehu.
“Pezullimin me efekt të menjëhershëm nga anëtarësia në Partinë Demokratike, dhe ku është rasti nga të gjitha funksionet drejtuese dhe nga Grupi Parlamentar i Partisë Demokratike, deri në distancimin e plotë dhe publik nga aktet e dhunës ndaj Partisë Demokratike, dhe veprimeve që dëmtojnë interesat elektorale apo politike të Partisë Demokratike, të: Agron Shehaj, Aldo Bumçi, Belind Këlliçi, Blendi Himçi, Çlirim Gjata, Edi Paloka, Edith Harxhi, Eno Bozdo, Ervin Minarolli, Genc Deromemaj, Genc Pollo, Gent Strazimiri, Ivi Kaso, Ledina Mandija, Lorenc Luka, Luan Baçi, Mimoza Hajdarmataj, Oerd Bylykbashi dhe Tritan Shehu”, thuhet në vendim.
Kryesia e PD akuza “Foltores” së Berishës
Më tej në Kryesia e Partisë Demokrtike ka hedhur edhe akuza të forta në adresë të ish-kryeministrit Sali Berisha dhe mbështetësve të tij, ndërsa bëhen të ditura edhe arsyet se përse u vendos të shpartallohej “Foltorja”.
Sipas Kryesisë së PD, përjashtimi i Berishës dhe mbështetësve të tij, si dhe pezullimi për disa besnikë të tij, erdhi për shkak se në protestën e 8 janarit që u organizuar nga Grupi i Rithemelimit në Partinë Demokrtike, u përdor dhunë dhe madje u rrezikua jeta e zyrtarëve të lartë të PD, si deputetët apo anëtarë të lartë demokratë.
“Përjashtimi dhe pezullimi i personave të më sipër, vjen pas sulmit të dhunshëm dhe të parapërgatitur të 8 Janarit mbi Selinë Qendrore të PD, që vuri në rrezik serioz jetën e anëtarëve të Kryesisë, Grupit Parlamentar, Këshillit Kombëtar, Kuvendit Kombëtar, dhe vetë anëtarëve të partisë që ishin thirrur në një protestë që ishte lajmëruar si paqësore, por ishte përgatitur për të shkaktuar gjakderdhje mes demokratëve;
Pas shkatërrimit të paprecedentë të selisë blu, nga individë me rekorde kriminale dhe pa asnjë lidhje me PD, të urdhëruar, organizuar dhe nxitur nga organizatorët e protestës; Pas tentativës që përmes akteve të dhunës dhe kërcënimeve për destabilizim t’i imponohen vendimmarrjes së shumicës dërrmuese të të gjitha institucioneve të partisë; Pasi kanë kaluar 48 orë dhe nuk ka asnjë akt distancimi nga dhuna e paprecedentë e urdhëruar, organizuar dhe nxitur nga disa anëtarë të partisë, ndaj partisë së tyre dhe anëtarëve të Partisë Demokratike”, thuhet në vendimin e Kryesisë së PD./Rigers Seliman
