Me shumë gjasë brenda disa javësh vendi pritet të shkojë në zgjedhje të pjesshme vendore në 6 bashki pa kryetarë. Gjykata Kushtetuese la në fuqi zgjedhjet e 30 qershorit 2019, duke prishur planet e presidentit.
Por 6 bashki në vend janë pa kryetarë, për shkak se disa janë shkarkuar e të tjerët janë dorëhequr. Meta prej më shumë se një viti mbajti peng procesin, sepse nuk njihte zgjedhjet vendore.
Por pasi Kushtetuesja e la në baltë, Meta duket se ka vendosur të shpallë zgjedhjet e reja. Ai dje i ka dërguar një letër kreut të KQZ, Ilirian Celibashi, ku ka kërkuar të dhënat mbi bashkitë pa kryetarë.
Por këto zgjedhje duket se do të shtojnë konfliktin në PD, e cila është ndarë në dy kampe. Në studion e “Zona Zero” u diskutua mes dy ekspertëve të njohur Kristaq Kume dhe Jordan Daci në lidhje me faktin se nëse zgjedhjet mbahen brenda një harku të shkurtër kohor, cila PD do të regjistrohet, ajo që përfaqësohet nga Lulzim Basha apo Sali Berisha.
Për Kumen gjithçka është e qartë, në KQZ duhet të regjistrohet PD e përfaqësuar nga Basha, pasi ai njihet deri më tani nga Gjykata, ka vulën dhe selinë. “Ligjërisht është Basha ai që ka vulën figurative dhe institucionale, ai që në KQZ e pret e i merr propozimet e tij për kandidatët. Edhe grupimi tjetër mund të përfaqësohet, por jo si subjekt politik, por me qytetarët, pa parti.
Unë nuk shoh rrugë tjetër”, tha Kume. Juristi Daci mbajti këtë qëndrim për sa kohë që nuk ka ndonjë të fundit nga Gjykata për statusin e PD-së. “Vërtetimi i fundit në partitë politike është ai që është regjistruar i fundit në Gjykatë. Do të jetë vendimi i fundit i Gjykatës që vendos.
Për momentin është ajo PD-ja që është e përfaqësuar në Kuvend. Nëse ndodh ky ndryshim, ka një pjesë që ka ankim dhe nuk ushtrohet. Edhe këtë nëse do të kishim një vendimmarrje e një ankim, gjendja do të mbetet e pandryshuar”, theksoi Daci.
Strategjia e Metës
Lëvizja e presidentit pritet që t’i trazojë ujërat. Së pari, do ketë një konflikt se kush do përfaqësohet me listat në KQZ. Së dyti, duket se kjo është dhe një strategji për të goditur Bashën. Deri dje Meta shprehej se ishte kreu i PD që i kishte kërkuar të shtynte zgjedhjet vendore dhe Meta nuk i njihte, por befas ai ka ndërruar kurs.
Futja e PD në zgjedhje në një moment të tillë, padyshim do sillte disfatë. Disa bashki pa kryetarë janë Shkodra, Durrësi, Vora, Lushnja, Dibra e Rrogozhina. Pra kemi mes tyre 4 bashki të mëdha dhe mes tyre Shkodra. Nëse PD humbet aty dhe në bashkitë e tjera, atëherë kjo mund të përdoret si alibi nga Berisha se Basha nuk fiton dot zgjedhje dhe pësoi disfatën e radhës kundër Ramës.
Pra duket se kemi një skenar të mirëmenduar Meta-Berisha. Dje presidenti e tregoi hapur se është palë me Berishën dhe duket se manovra e zgjedhjeve është një lloj “kurthi” për Bashën. Nga ana tjetër, ky i fundit do zbresë nga e hëna në bazë kudo prite të forcojë radhët në degë./Sot
