Seanca e djeshme plenare është karakterizuar nga debate dhe akuza të shumta mes opozitës dhe mazhorancës. Ashtu siç edhe ishte paralajmëruar në mbledhje grupi, Partia Demokratike nuk i kurseu sulmet ndaj mazhorancës si dhe thirrjet ndaj qytetarëve për tu ngritur në protestë. Por pikërisht pas këtyre thirrjeve si dhe akuzave të bëra nga kreu demokrat Lulzim Basha dhe ish-kryeministri Berisha kundrejt kampit socialist, ka ardhur dhe reagimi i këtyre të fundit.
Ka qenë vetë kreu i grupit parlamentar të PS, Taulant Balla, i cili nga foltorja e Kuvendit, teksa u ndal tek protesta e opozitës, u shpreh se kjo protestë organizohet për familjarët e Berishës, pasi sipas tij, djalin e ish-kryeministrin, Shkëlzen Berisha e kanë thirrur në prokurori për dosjen CEZ.“Dilni në protestë! Jam shumë i sigurt që ka një arsye të fortë Sali Berisha të dalë në protestë në 27 janar; dhe retorika, gjuha e përdorur tregoi edhe tensionin e tij familjar. Mediat njoftojnë që Shkëlzen Berisha së bashku me Nue Kalajn janë sot të thirrur nga Prokuroria e vendit tonë për një vepër penale të rëndë: atë të shpërdorimit të detyrës nga ana e babait, por edhe shndërrimit të të birit në një ryshfetxhi. 414 milionë euro është fatura që shteti shqiptar e populli shqiptar paguan vetëm për një çështje të vetme, atë të CEZ.
Sot, kur Prokuroria njofton thirrjen dhe marrjen në pyetje të Shkëlzen Berishës, babai i tij i bën thirrje shqiptarëve që “o burra, të rrëzojmë këtë qeveri e këtë shtet ligjor”, u shpreh Balla. Ndërkaq Balla tha se kjo protestë po bëhet edhe për të mbrojtur largimin e drejtorëve të LSI nga detyra. Shqetësim që socialistët e kanë ngritur për shkak të abuzimeve të shumta që këta të fundit kanë bërë. “Dilni në protestë, edhe për drejtorët e LSI, patjetër duhet të dilni edhe për ata në protestë. Dilni edhe ju demokratë të thjeshtë e të ndershëm për drejtorët e LSI. Mos qeshni ju deputetët e PD-së! Dilni në protestë bashkë edhe me të akuzuarit e vrasjeve të 21 Janarit!”, tha ai.
Balla: Protesta e opozitës kundër reformës në drejtësi
Kreu i grupit parlamentar të PS, Taulant Balla nga foltorja e Kuvendit, theksoi gjithashtu se protesta e opozitës po bëhet kundër reformës në drejtësi. Sakaq, Balla tha se reforma do të bëhet pavarësisht pretendimeve të ngritura nga opozita. Më tej, deputeti socialist deklaroi se shumë shpejt do të dalin dhe rezultatet e personave që PD i ka mbajtur në krye të institucioneve dhe që i ka mbrojtur për vite me radhë. “Dilni në protestë kundër Reformës në Drejtësi, sepse në Shqipëri është ngjizur një aleancë e re, një aleancë që në fakt e ka bërthamën që në 2014-ën kur mori rrugë Reforma në Drejtësi.
Shumë prej jush në 22 korrik,- edhe pse votonim, ju me pahir,- përsëri thoshit: “Bëni ç’të doni, por kjo Reforma në Drejtësi nuk ka për t’u zbatuar asnjëherë sepse ka ca probleme dhe nuk zbatohet.” Por ja që Reforma në Drejtësi po zbatohet; ja që rezultatet e para të Vettingut dalin javën e ardhshme apo ditët në vijim. Ata njerëz që ju i mbrojtët me shumë luftë për t’i mbajtur në ato pozicione, do dalin që na paskan qenë pa arsimin përkatës dhe na paskan qenë të zhytur në pasuri e në prona pafund, do të dalin. Arsyeja është e thjeshtë: sepse ju ishit kundër Vettingut. Dilni e protestoni edhe kundër Reformës në Arsim! Jemi mësuar tashmë se një nga gjërat që ju dhemb më shumë është se nuk është më “Kristali”, nuk është më “Vitrina”, s’janë më ato; kur i shfrytëzonit edhe për fushatë elektorale”, u shpreh kreu i grupit parlamentar të PS, Taulant Balla dje./SOT
