Kërkonte të ishte protagonist dhe po ia del. Rey Manaj më në fund e sheh veten si një emër i vlerësuar në Serinë A. Një objektiv i arritur për sulmuesin e destinuar që në moshë të re të arrinte në nivelet më të larta, edhe pse rrugëtimi ishte i vështirë.
Por Manaj është mësuar me vështirësitë që në fëmijëri, siç ka treguar në një intervistë për “La Gazzetta Dello Sport”, ku ka zbuluar se si kishte udhëtuar për herë të parë drejt Italisë si një refugjat me gomone.
“Mbërrita me prindërit e mi në shtëpinë e një tezeje në Katelkiodato, në provincën e Romës. Ishte viti 2000, sapo kishte përfunduar lufta në Kosovë. Një mëngjes në orën 5 na trokitën në derë, ishte kontrolli. Nuk kishim dokumente, na rikthyen në Shqipëri.
Dy vite më vonë u kthyem me dokumente të rregullta. Babai im na kishte paraprirë për të gjetur punë. Unë udhëtova me gomone me mamanë, motrën e vogël dhe një teze. Për fat isha i vogël dhe nuk kujtoj asgjë nga ai udhëtim.
Por e di që u nisëm pa pasur sigurinë që do të mbërrinim. Pas një periudhe në Kastelkiodato u transferuam në Kodonjo. Dhe aty filloi historia ime me futbollin”, kujtoi Manaj, i cili më pas foli për pjesën e futbollit të luajtur, nga Interi te Barcelona e tani te Specia.
Rey, Mançini ju dha debutimin në Serinë A në moshën 18-vjeçare. Po pastaj çfarë nuk funksionoi?
Mançini ishte një pikë referimi për mua. Më mbajti gjithmonë në stërvitje me ekipin e parë. Më kujtohet debutim me Atalantën dhe goli i Jovetiç pak minuta pasi hyra në fushë. Por kthesa ishte takimi me Xhixhi Simonin te Kremoneze.
Isha duke ndërruar klub, më tha të qëndroja pasi edhe pse isha 16 vjeç, do të luaja me skuadrën e parë. Është falë asaj eksperience që shkova më pas te Interi, një ëndërr për mua që kisha qenë gjithmonë tifoz i Interit dhe i isha gëzuar “triplete” në vitin 2010. Me shumë mundësi kur mbërrita te Interi nuk isha ende gati në nivelin fizik e mendor. Kam ende shumë miq atje, dëgjohem shpesh me Perishiç e Brozoviç.
Meqë po flasim për ëndrrat, cili është kujtimi më i bukur nga eksperienca te Barcelona?
Janë shumë. Më vjen në mendje firma në kontratë, Më dukej sikur po luaja FIFA në Play Station dhe po zgjidhja karrierën e futbollistit, por në fakt ishte gjithçka e vërtetë. Në fillim isha me skuadrën bashkë me Gavi, Arauho, Riki Puig dhe të tjerë. Më pas kalova në ekipin e parë, rreth dy muaj kisha nderin të vrapoja e stërvitesha me Messin.
Në ato dhoma zhveshje nuk flisja shumë, por dëgjoja gjithçka. Në grumbullimin e verës së kaluar tregova se mund të luaja shansin tim. Në miqësoren e parë shënova tre gola. Në ato ditë, më kërkonte një tjetër klub i La Liga, por Barcelona vendosi të më mbante. Por pastaj isha unë që kërkova që të largohesha.
Përse?
Kuman më kishte shpjeguar situatën. Te Barcelona pas largimit të Mesit kishte shumë konfuzion. Do të përforconin sulmin, por unë do të kisha mundësinë herët apo vonë që të tregoja vlerat e mia. Por vendosa të vija bast për veten dhe të tregoja që mund të isha protagonist në një kampionat të madh. Ishte çështje kohe. Edhe unë u largova para Grizamn. Nëse ai do të largohej i pari, unë do të qëndroja te Barcelona.
Përse zgjodhët Specian?
Ishte një bast i bukur. Një klub ambicioz që po konsolidohet, një skuadër e re, një trajner që po ndërton rrugëtimin e tij pasi ka qenë një kampion. E kuptova që të Specia mund të afirmohesha përfundimisht.
Mbijetesa është shumë afër, cili është sekreti që mos ia komplikoni vetes jetën?
Të cilësojmë çdo pikë si të rëndësishme. Në fazën e fundit të sezonit, një barazim vlen trefish. Kemi një avantazh të mirë, por nuk duhet ta shpërdorojmë.
Çfarë ju ka mësuar Tiago Mota?
Na kërkon intensitet të lartë në çdo stërvitje, është një motivues i madh, përveçse një person i përulur i cili jeton me futbollin. Nuk mburret kurrë për të kaluarën, tregon një pasion të ndjeshëm për punën e tij.
Cila është ëndrra e radhës që do të realizosh?
Mbijetesa me Specian. Pastaj jam kureshtar të shoh çfarë do të bëjë Shqipëria ime. Kemi një grup ambicioz, brezi i ri është i fortë dhe kemi objektiv të kualifikohemi në Europianin e radhës. Më kujtohet ende me drithërima debutimi im me kombëtaren, e nisa nga stoli dhe shënova pas 10 sekondash.
