Sali Berisha duket se nuk po e përtyp dot vendimin e Departamentit Amerikan të Shtetit për ta shpallur person “non grata”.
Qysh kur amerikanët i treguan vendin rreth një vit më parë, ish-kryeministri Berisha po lëviz të gjithë gurët, me shpresë se do të amnistohet nga DASH, ndërkohë që paralelisht përdor daljen në media e rrjetet sociale për t’i bërë presion dhe sfiduar hapur, duke ua bërë të qartë se është i pastër.
Por kjo strategji e ndjekur nga Berisha i ngjan më shumë një lufte me mullinjtë e erës, pasi i madh e i vogël e di që Shtetet e Bashkuara të Amerikës vendimin për ta shpallur persona të padëshiruar, e kanë marrë në bazë provash dhe faktesh autentike.
Kjo ka bërë që Berisha ditët e fundit të riaktivizohet dhe të marrë zemër, duke nisur sulmet ndaj amerikanëve. Zoti Berisha po përdor si mburojë kostumin e kreut të ardhshme të Partisë Demokratike, për t’i bërë presion Uashingtonit.
Berisha: Sekretari Blinken të nxjerrë provat ndaj meje
Këtë fundjavë ish-kryeministri Sali Berisha i ka bërë thirrje edhe njëherë tjetër Sekretarit të Shtetit, Antony Blinken që të nxjerrë provat për shpalljen e tij “non grata”, ndryshe siç theksoi ai do të vijojë betejën e tij për dinjitet.
Madje, Berisha pretendon se janë me dhjetra shkrime në SHBA që thonë se nuk asnjë provë dhe se pas këtij vendimi, sipas tij, fshihet multimiliarderi, Xhorxh Sorosi. “Zoti na ruajttë nga miqtë se nga armiqtë ruhem vetë. Shqiptarët kanë kodet e tyre dhe i respektojnë ato. Për zyrtarët e DASH kam një sugjerim, ose të kërkojnë të falur ose të publikojnë faktet, përndryshe unë do të vijoj betejën time për dinjitet.
Janë me dhjetra shkrime në SHBA që nuk ka asnjë fakt dhe ky është një lobim i Xhorxh Soros. Janë nxjerrë edhe lidhjet e familjes së Blinken me Soros. Në këtë rast unë i them Blinken se është Kongresmeni amerikan Lee Zeldin, i cili nuk ka marrë akoma përgjigje për pyetjet e tij”, deklaroi ai.
Më tej Sali Berisha ka bërë edhe një gafë të rëndë në kufij e lajthitjes, teksa ka deklaruar se nuk shek në tokën amerikane, për sa kohë Antony Blinken do të jetë në krye të Departamentit Amerikan të Shtetit.
“Nuk shkojë në SHBA për sa kohë Blinken do jetë Sekretar Shteti”, u shpreh ai. mirëpo kjo deklaratë duket absurde, pasi edhe nëse Sali Berisha dëshiron, ai nuk mund të shkojë në Shtetet e Bashkuara rë Amerikës, pasi është shpallur “non grata”.
Ish-kryeministri thirrje ambasadores Kim: Më kërko falje
Por nuk ndalet me kaq, pasi të njëjtën thirrje që i ka bërë Sekretarit Blinken, ish-kryeministri ka drejtuar edhe në adresë të ambasadores së Shteteve të Bashkuara të Amerikës në Tiranë, Yuri Kim. Teksa ishte duke folur këtë të premte që lamë pas në emisionin “Zonë e Lirë”, Berisha ka deklaruar se ambasadorja e Shteteve të Bashkuara Yuri Kim është e mirëpritur në selinë blu, për sa kohë që i kërkon falje të gjithëve për barin e servirur.
I drejtpërdrejt në atë që thoshte, Berisha theksoi se deklarata e ambasadores Kim sipas tij, ishte fyerja më e madhe e bërë në këtë tre dekada demokraci.“Dera e PD-së është e hapur për të gjithë ambasadorët dhe përfaqësuesit e vendeve mike. Ajo duhet tu kërkojë falje të gjithëve për barin që u serviri. Ishte fyerja më e madhe në 30 vite”, u shpreh Berisha.
