Prokuroria e Posaçme kundër Korrupsionit dhe Krimit të Organizuar (SPAK), ka shpallur procedurën e konkurrimit për tetë vende vakante për Hetues në Sektorin e Hetimit Financiar.
Nëpërmjet një njoftimi, Prokuroria e Posaçme kundër Korrupsionit dhe Krimit të Organizuar (SPAK) thotë këta hetues do të kenë përgjegjësi të kryejnë verifikime të mjeteve financiare dhe pasurive të personave nën hetim dhe të raportojnë rezultatet tek prokurorët e posaçëm kompetentë.
Ndërkohë, sqarohet se në momentin e aplikimit kandidatët duhet të japin pëlqimin për kontrollin periodik të llogarive të tyre bankare dhe telekomunikimeve vetjake.
Sipas SPAK, aplikantët duhet të kenë diplomë në drejtësi, në financë apo në fusha të tjera përkatëse, të lidhura me fushën e hetimeve financiare. Gjithashtu duhet të kenë një eksperiencë pune jo më pak se dy vjet si Oficerë të Policisë Gjyqësore.
Të plotësojnë kushtet e sigurisë përpara emërimit në detyrë dhe të kenë plotësuar me sukses procesin e përzgjedhjes sipas procedurës së konkurrimit të organizuar nga Prokuroria e Posaçme. Më pas do ti nënshtrohen përzgjedhjes që përbëhet nga 4 faza.
Afati i aplikimeve dhe dokumentacionit shoqërues përfundon më 12 maj 2022. “Në mbështetje të neneve 7 dhe 21 të Ligjit 95/2016 Për organizimin dhe funksionimin e institucioneve për të luftuar korrupsionin dhe krimin e organizuar”, të ndryshuar, neneve 10/2, 17 dhe 18/4 të ligjit nr.25/2019 “Për organizimin dhe funksionimin e policisë gjyqësore”, të Urdhërit nr.227, date 11.04.2022 të Drejtuesit të Prokurorisë së Posaçme “Mbi Komisionin dhe procedurën e përzgjedhjes së hetuesve të Sektorit të Hetimit Financiar në Prokurorinë e Posaçme”.
Kandidatët që shfaqin interes për të marrë pjesë në konkurrim duhet që të plotësojnë këto kushte: Të kenë mbaruar studimet për drejtësi, të kenë eksperiencë punë jo më pak se dy vite si Oficer të Policisë Gjyqësore, të plotësojnë kushtet e sigurisë para emërimit në detyrë “Për organizimin dhe funksionimin e institucioneve për të luftuar korrupsionin”, të kenë përfunduar me sukses procesin e përzgjedhjes sipas procedurës së konkurrimit të organizuar nga prokuroria”, bëhet me dije në njoftimin e SPAK.
Dokumentacioni që duhet të dorëzohet
Ndërkohë, sa i përket dokumentacionit që kandidatët duhet që të dorëzojnë bëhet me dije se, duhet që të dorëzohet kërkesa për tu emëruar hetues në Sektorin e Hetimit Financiar në Prokurorinë e Posaçme, kopjen e diplomës dhe listës së notave dhe përvoja e punës.
“Kandidatët duhet të dorëzojnë pranë Sektorit të Burimeve Njerëzore në Prokurorinë e Posaçme dokumentacionin e kërkuar, i cili, duhet të përmbajë: Kërkesën për tu emëruar hetues në Sektorin e Hetimit Financiar në Prokurorinë e Posaçme; Jetëshkrimin e detajuar të Kandidatit; Kopjen e diplomës dhe listës së notave, të arsimit të lartë dhe çdo dokument tjetër që tregon plotësimin e kriterit të arsimit, sipas legjislacionit në fuqi për arsimin e lartë;
Librezën e punës ose çdo dokument tjetër që vërteton përvojën në punë të kandidatit i oficer i policisë gjyqësore në seksionet e policisë, si oficer i policisë gjyqësore në shërbimet e policisë Gjyqësore ose si oficer i policisë gjyqësore në organe dhe institucione të tjera”, thuhet në njoftim.
