Pavarësisht entuziazmit që ka shfaqur kohët e fundit, ish-kryeministri Sali Berisha duket se është skeptik sa i takon protestës së thirrura prej tij. Javën që lamë pas ish-kryeministri Berisha njoftoi mbajtjen e një tubimi më 7 korrik kundër qeverisë “Rama 3”, ndërkohë që gjata fundjavës ai ftoi edhe maturantët të protestonin kundër reformave dhe politikave të ndjekura nga Ministria e Arsimit. Por edhe pse e trumbetoi me të madhe, maturantët nuk iu përgjigjen thirrjes së tij, duke e bojkotuar dhe madje anuluar protestën e thirrur nga vetë ata këtë të hënë që shkoi para institucionit të drejtuar nga ministrja Evis Kushi.
Por kjo lëvizje e maturantëve, duket se i ka dhënë një goditje të fortë Berishës, i cili dje ka paralajmëruar dështimin e protestës së 7 korrikut. Madje ndërsa ndodhej në një tryezë me shoqërinë civile, por edhe gjatë fjalës së tij në Kryesinë e Partisë Demorkatike ditën e djeshme, kreu i “Foltores” i bëri thirrje shoqërisë civile dhe qytetarëve t’i bashkohen tubimit të thirrur prej tij. Ai u shpreh se kjo është protestë e qytetarëve duke theksuar se ka një rëndësi shumë të madhe.
“Jo si një protestë e PD, por e mbarë qytetarëve shqiptarë. Nuk ka dyshim se roli i PD në organizimin e kësaj është përcaktues, por PD shkon drejt kësaj proteste me një koalicion të gjerë me shoqërinë civile, me personalitete aktive në jetën publike dhe me forca politike opozitare të vërteta parlamentare dhe jo parlamentare. Kanë filluar aktivitetin, takimet por ajo që kërkoj është intensifikimi maksimal i përpjekjeve tona në mënyrë që kjo protestë të shprehë të gjithë shqetësimet e mëdha, problemet madhore me të cilat përballen sot shumica dërrmuese e qytetarëve shqiptarë”, deklaroi Berisha.
LSI nis përgatitjet për protestën e 7 korrikut
Ndërkohë teksa “Foltorja” ka paralajmëruar dështimin e protestës, në lojë ka hyrë kryetarja e Lëvizjes Socialiste për Integrim, Monika Kryemadhi, e cila ka deklaruar se do të bashkojë forcat me ish-kryeministrin Sali Berisha në protestën e 7 korrikut, e thirrur nga ky i fundit. Duke folur ditën e djeshme në një studio televizive, Kryemadhi ka thënë se, pjesëmarrja në protestë, nuk është vetëm detyrim politik, por shoqëror e njerëzor. “Sot nuk është më thjesht detyrim politik por detyrim shoqëror dhe njerëzor ndaj çdo proteste, çdo qytetar dhe aq më shumë ata që janë aktivistë të partive politike duhet të jenë pjesë e protestës.
Edhe pse janë ditët e nxehta të korrikut njerëzit sa janë aktivë për protestën aq dhe më shumë duan dhe të dinë hapat e mëtejshëm të protestës. Pasojat e zgjedhjeve të kaluara ndihen në shoqërinë shqiptare, ndihen në partitë politike ndihen në media ndihen kudo. Dhe aq më shumë situata politika që rrodhi pas 25 prillit, sulmet e një pas njëshme për dëmtimin e opozitës. Për të shfokusuar opinionin publik nga problematikat që ka sot shoqëria shqiptare”, deklaroi Kryemadhi.
Riaktivizohen kamikazët, avokati-Berishës: Do t’ia vëmë flakën apo jo më 7 korrik?
Avokati Përparim Rama, në fjalën e tij në takimin që ish-kreu i Partisë Demokratike mbajti dje mbajtur me shoqërinë civile, ka pyetur ish-kryeministrin Sali Berisha se cilat do të jenë veprimet që do të ndërmerren në protestën e 7 korrikut. “Çdo bëhet më 7 korrik, kjo buron nga një eksperience shumë e keqe sepse në protesta të mëparshme kam pësuar shok respirator dhe kam qenë në rrezik jete.
Preferoj të vdes me plumb jo nga mungesa e frymëmarrjes. Mund të rrimë të flasim pa fund për bëmat e kësaj qeveria. Dua të di ç’keni menduar? Nëse policia do bëjë forcë disporpocionale kundër nesh çdo bëjmë? Do t’ia vëmë flakën apo jo? Nëse nuk bëjmë veprime radikale dhe shkojmë atje të hamë gaz mua nuk më keni”, deklaroi Rama.
“Vetëflijuesit” për Berishën, Liçaj: Do protestoj për rrëzimin e kësaj qeverie me çdo kusht
Ndërsa aktori Neritan Liçaj deklaroi dje se do të marrë pjesë në protestën e thirrur nga Sali Berisha më 7 korrik. Gjatë një aktiviteti të zhvilluar nga ish-kryeministri, Liçaj theksoi se do të protestojë për rrëzimin e kësaj qeverie pa asnjë kusht.
Sipas tij, nëse Shqipëria do të futet në Evropë nuk do të futet vetëm me institucione, por do të futet me një qytetërim të vetin. “Kauza ime është fare e thjeshtë, është Shqipëria. Të gjithë e duam këtë vend. Kauza tjetër kush? Është Shqipëria në Evropë. Nëse ne do të futemi në Evropë, nuk do të futemi vetëm me institucione, por do të futemi edhe me një qytetërim tonin, që është shqiptaria. Këtë e bën arti kultura, shkenca, sporti, media dhe arsimi. Arti forcon dy muskujt më të fortë të njeriut, zemrën dhe mendjen. Jo me kot gjithë demokracitë e mëdhaja investojnë shumë në art. Duke patur një qytetarë të civilizuar mund të ndërtohet një shoqëri moderne. Unë protestojë për rrëzimin e kësaj qeverie pa asnjë kusht. U them shqiptarëve që kombet e mëdhenj japin jetën për lirinë, kurse shumë shqiptarë falin lirinë për jetën dhe kjo nuk është e mirë”, deklaroi ndër të tjera Liçaj.
