Një prej drejtuesve lokalë të PD, kreu i degës 4 në Tiranë Ervin Goxhaj sqaroi dje arsyet përse nuk do t’i bashkohet protestës së Sali Berishës. Sipas tij, protesta është e pasinqertë, e më shumë sesa luftë ndaj kundërshtarin thellon ndarjen e brendshme.
Kreu i degës 4 të demokratëve në Tiranë Ervin Goxhaj i bashkohet grupit të demokratëve që do të bojkotojnë protestën e thirrur nga ish kryeministri, ndërsa theksoi gjatë një prononcimi për mediat dje se sipas tij, kjo protestë është më shumë sesa luftë ndaj kundërshtarit do të thellojë ndarjen brenda PD. “Për mendimin tim, protesta është e pasinqertë. Ne kemi organizuar protesta në 8 vite, janë protestat më të mëdha që PD ka bërë ndonjëherë i kemi bërë kur nuk kemi qenë të përçarë, por si mund të bësh protestë kur e ke shtëpinë të përçarë.
E shoh si protestë që i shërben përçarjes së mëtejshme të PD, jo luftë kundër regjimit. Kurrsesi nuk i paragjykoj vendimet e gjykatave, madje i respektoj ato, nëse gjykata i jep të drejtë Berishës, unë do të jem një votues i thjeshtë, për sa kohë që Sali Berisha dhe ish ministra të tij që duan të bëhen sërish ministra, sepse nuk ka të ardhme, Berisha nuk ka të ardhme”, deklaroi Goxhaj. Me skepticizëm sheh edhe bashkëpunimin në horizont LSI-PD, pasi sipas tij, partia që me gjasë do drejtohet sërish nga Ilir Meta synon vetëm të përfitojë nga partia më e madhe e opozitës. “LSI dhe PD kanë provuar që në 2009 që janë si një trup i bakterizuar, që PD është trupi dhe LSI bakteri që kërkon të ushqehet.
Demokratët e ndershëm, jo ata që mbase kanë përfituar, e dinë se çfarë i ka hequr kurrizi nga LSI. Sakrifica e tyre është hedhur përtokë nga drejtorët e ministrat e LSI”, tha ai. Kreu i degës 4, të cilin Rithemelimi e ka zëvendësuar me një tjetër drejtues mohon edhe zërat që Lulzim Basha po planifikon krijimin e një partie të re. Madje për të, rikthimi në krye të PD i ish kryedemokratit është i mirëpritur. “Për mendimin tim që Basha ta mendojë rikthimin ka të drejtën e vet dhe po ta bëjë, shumë mirë do bëjë. Kam diskutuar shpesh dhe gjatë, biseda për parti të re është e vetmja që s’kemi diskutuar kurrë”, nënvizoi Goxhaj.
