Ura Peljeshki në Kroaci, inaguruar me bujë pak ditë më parë, është në fakt një goditje e rëndë për Bosnjën, pasi e shmang këtë të dytën, duke e futur në izolim komunikativ. Për këtë arsye madje, kjo vepër e madhe infrastrukturore në Ballkan, është shoqëruar dhe me teori komploti gjeopolitik, aq më tepër kur është financuar nga BE dhe Kina.
Këtë fakt ka potencuar gjermania Frankfurter Allgemeine Zeitung, e cila shkruan se “nuk do të kishte asnjë mbështetje nga Bashkimi Evropian për ndërtimin e urës Peljeshki në Kroaci nëse do të kishte ndonjë perspektivë evropiane për Bosnjën”. Pra sipas saj, nuk ekziston asnjë projekt i Brukselit për ta patur vendin ballkanik me shumicë muslimane në Union ndonjë ditë. Kjo gazetë shkruan se me hyrjen e Bosnje-Hercegovinës në bllok askush nuk do të kishte nevojë për një urë të tillë.
FAZ pretendon se ideja e ndërtimit të një ure fillimisht u refuzua si e pakuptimtë, por me kalimin e kohës mori mbështetje nga Brukseli.
“Kur BE hoqi dorë nga rezistenca e saj për financimin e ndërtimit të urës në vitin 2017, mund të konkludohej se askush në Bruksel nuk priste seriozisht që Bosnja të bashkohej me BE. Sepse, kjo është mënyra e vetme për të justifikuar një bypass rreth Bosnjë-Hercegovinës, përmes të cilit, përveç Dubrovnikut, mund të arrish më shpejt edhe në Korçulë apo Mljet”, shkruan Frankfurter Allgemeine Zeitung, përcjell Deutsche Welle.
Përveç Kroacisë, më së shumti ka përfituar Kina
Shtohet se nuk ka asnjë arsye reale për të festuar hapjen e urës.
Në tekst thuhet se nga ndërtimi i urës, përveç Kroacisë, më së shumti ka përfituar Kina, e cila, siç përfundon FAZ, në të ardhmen do të përjashtohet nga projektet e mëdha të Bashkimit Evropian, kështu që “qindra milionë euro para të taksapaguesve në BE nuk do të shkonin për diktaturën kineze”, konkludon gazeta gjermane.
