Struktura e Posaçme Kundër Krimit të Organizuar dhe Korrupsionit po merr udhëzime nga SHBA, e cila duket e vendosur për të çuar para drejtësisë “koka të mëdha” të fuqishme që deri më sot kanë qenë të paprekshëm. Treshja më e rëndësishme e SPAK ndodhet në Uashington për një vizitë në Departamentin e Drejtësisë.
Gazeta ka zbardhur detaje nga takimi i fundit i SPAK dhe BKH me ekspertë të lartë amerikanë të cilët kanë çuar pas hekurave pushtetarë të lartë të korruptuar. Ministra, zv.ministra, krerë bashkish dhe funksionarë të lartë janë paditur shumë herë, por gjithmonë ja kanë hedhur paq. Por SPAK duket se ka filluar të forcojë radhët, pasi në luftën ndaj korrupsionit po asistohet fuqishëm nga SHBA. Në fokus të këtij takimi me sistemin e drejtësisë së SHBA, ishte mbështetja e madhe nga amerikanët për të luftuar krimin e organizuar dhe korrupsionin publik në Shqipëri
Sinjali i fortë amerikan për pushtetarët shqiptarë
Ekspertë të lartë të divizionit Penal të Departamentit të Drejtësisë së Shteteve të Bashkuara dhanë një sinjal shumë të fortë për politikën në Shqipëri, pasi prokurorët e avokatët e Divizionit Penal që po udhëzojnë drejtësinë e re shqiptare, ndjekin penalisht shumë raste të rëndësishme kombëtare dhe formulojnë dhe zbatojnë politikën e zbatimit të ligjit. Ata kanë çuar në burg njerëz me pozita shumë të larta.
Avokatët e divizionit gjithashtu ofrojnë këshilla dhe udhëzime për Prokurorin e Përgjithshëm të Shteteve të Bashkuara, Kongresin e Shteteve të Bashkuara dhe Shtëpinë e Bardhë për çështjet e ligjit penal. Divizioni Penal drejtohet nga një Ndihmës Prokuror i Përgjithshëm, i emëruar nga Presidenti i Shteteve të Bashkuara Joe Biden me këshillën dhe pëlqimin e Senatit. Kenneth Polite u emërua nga Presidenti Biden dhe u betua si Ndihmës Prokurori i Përgjithshëm më 21 korrik 2021.
Nicholas McQuaid u emërua Zëvendës Ndihmës i Prokurorit të Përgjithshëm më 20 janar 2021. Ky i fundit ka në “patronazh” 600 prokurorë federalë të Divizionit që kryejnë hetime dhe ndjekje penale që përfshijnë krimin e organizuar dhe transnacional, dhunën e bandave, mashtrimin e letrave me vlerë, aferat në shëndetësi, shkeljet e ligjit të praktikave korruptive të huaja, korrupsion publik, krim kibernetik, vjedhja e pronës, pastrimi i parave, shkeljet e Aktit të Sekretit Bankar, shfrytëzimi i fëmijëve, trafikimi ndërkombëtar i narkotikëve, shkeljet e të drejtave të njeriut dhe krime të tjera, si dhe çështje që kanë të bëjnë me çështjet ndërkombëtare dhe teknikat e ndjeshme të zbatimit të ligjit.
Vija paralele me Shqipërinë
Prokurorët amerikanë që u shfaqën në takimin e fundit të SPAK, janë ekspertë të fushave më problematike në Shqipëri ku janë të implikuar zyrtarë të lartë, si aferat në shëndetësi, pastrimi i parave, korrupsioni publik, si edhe vjedhja e pronave. Sipas burimeve, disa emra rezultojnë të lidhur me grupe kriminale dhe kanë para të fshehura jashtë vendit.
Ka disa emra të njohur në të gjitha kahet e politikës që kanë para në parajsat fiskale dhe ndërkombëtarët i kanë zbuluar në kuadër të hetimeve që janë bërë atje për çështje të caktuara, sidomos sa i takon krimit të organizuar. Dosjet më të mëdha padyshim kanë të bëjnë me rrjetet kriminale ndërkombëtare, gjë që ka sjellë dhe ngritjen e grupeve të përbashkëta hetimore. SPAK u ngrit me ndihmën e SHBA dhe amerikanët po investojnë shumë. Gjithë qëllimi është të rritet besimi te drejtësia dhe sinjalet janë se goditjet në nivele të larta janë shumë afër. /Sot
