Kreu i Grupit Parlamentar të Partisë Socialiste, Taulant Balla, nga kryesia e Kuvendit ka bërë me dije ditën e djeshme se mazhoranca ka depozituar nismën për funksionimin e Autoritetit të Dosjeve.
Socialistët do të kërkojnë të tjera ndryshime ligjore për nismën që do të lërë jashtë politikës dhe funksioneve të tjera shtetërore bashkëpunëtorët e ish sigurimit të shtetit. Kreu i grupit parlamentar socialist Taulant Balla, njoftoi se kërkesa për ndryshimin e dy ligjeve të tjera bëhet në shtator.
Edhe pse refuzon ta konsiderojë nismë për të eliminuar politikisht Ilir Metën dhe Sali Berishën, kreu i Grupit socialist njofton se në ligjin e dekriminalizimit, krahas ndalimit të kandidimit të spiunëve të ish sigurimit, do të ketë të tjera ndryshime. “Një përmbledhje të të gjithë nismave, janë një paketë.
Në fund të korrikut është depozituar një nismë nga grupi i PS për dy ndryshime në dy ligje, njëri për Autoritetin e Dosjes dhe një në lidhje me ligjin për zgjedhjet. Janë nisma që bazohen në propozimin e ardhur për të hequr çdo pengesë dhe për të hedhur dritë mbi personat që zgjidhen apo emërohen. Për të hedhur dritë mbi pastërtinë e figurave.
Në Shqipëri në 30 vite ka pasur raste të tjera të cilat kanë arritur ti shmangen përgjegjësisë morale e jo vetëm e të arrijnë në herarkinë më të lartë shtetërore, duke dëmtuar jetën e shumë personave që kanë vuajtur krimet e Sigurimit”, tha Balla. Balla shprehet se ndryshimet do të pamundësojnë vazhdimin e ngjitjes së tyre në karrierë dhe hierarki dhe të pamundësohet kandidimi i tyre si anëtar i Kuvendit të Shqipërisë.
“Jo vetëm që këto fakte duhen bërë publike, por të pamundësojmë vazhdimin e ngjitjes së tyre në karrierë dhe hierarki dhe të pamundësohet kandidimi i tyre si anëtar i Kuvendit të Shqipërisë. Ky është draft pune. Drafti që ju keni bërë publik është një draft jo i plotë. Po u flisja për nevojën që në këtë kontekst të përfshihen edhe funksionarët që janë në jetën politike të vendit. Në këtë kontekst duhet të keni edhe pak durim”, u shpreh Balla.
Plani i Ramës për të nxjerrë nga politika me ligj Berishën dhe Metën
Socialistët po planifikojnë ti heqin qafe nga politika parlamentare Berishën dhe Metën. Në shtator parlamenti do ti “zbulojë” Ilir Metës dosjen e spiunit, çka do të bëhet shkas që më pas atij ti hiqet e drejta për të kandiduar dhe për tu zgjedhur.
Një truk i ngjashëm po përdoret edhe ndaj Berishës. Socialistët në pushtet po planifikojnë një amendim të ligjit të dekriminalizimit duke përfshirë në të edhe ‘djegien” e personave që janë shpallur non grata nga aleatët tanë perëndimore.
Një gjë e tillë e cila kërkon ndryshime kushtetuese me 94 vota do të bëhet vetëm me bashkëpunimin e mundshëm të deputetëve të PD-së që mbështesin linjën Basha. Shumica socialiste me këtë operacion të nisur në emër të pastrimit të politikës nga bashkëpunëtorët e ish sigurimit të shtetit tenton që me një gur të vras dy zogj.
Të diskreditojë dhe të ndalojë nga kandidimi politikanin I.M për të cilin autoriteti dosjeve thotë se është ish presidenti Ilir Meta, gjë të cilën ai e mohon kategorikisht. Nga ana tjetër të largojë njëherë e mirë nga Parlamenti e ti jap fund të qënurit deputet të “non gratës” amerikane dhe britanike Sali Berisha. Edi Rama la të kuptohet se legjislatura e ardhshme parlamentare që pritet të nis në shtator do të ketë prioritet këtë çështje.
