Amerikanët sot e kanë paralajmëruar Saliun. Ata kanë kërkuar të ndalë sulmet e akuzat ndaj diplomatëve amerikanë, teksa e kanë vënë sërish theksin te goditja e atyre që janë zhytur në afera korrupsioni.
Departamenti Amerikan i Shtetit i ka dhënë një shuplakë të fortë ish-kryeministrit Sali Berisha.
Ky i fundit ditët e fundit ka shpërthyer në sulme banale ndaj Zv/Ndihmës Sekretarit Gabriel Escobar dhe ambasadores Yuri Kim dhe DASH sot ka reaguar duke ja bërë të qartë se ai është në rreth të kuq për ta. Berisha akuzoi diplomatët se kanë bashkëpunuar me McGonigal për të vënë gjoba, por DASH në një reagim për “Report Tv”, ka deklaruar prerë se për ta, Berisha nuk është gjë tjetër veçse një i sanksionuar për korrupsion.
“Akuzat e Sali Berishës, i cili u caktua nga Sekretari i Shtetit për korrupsion të theksuar, janë qesharake. Shtetet e Bashkuara e kanë të qartë përkushtimin tonë ndaj demokracisë dhe luftës kundër korrupsionit. Ne inkurajojmë të gjitha partitë politike që të angazhohen në diskurs konstruktiv dhe të mbështesin zgjedhje të lira dhe të ndershme”, thuhet në reagimin e DASH.
Javën që lamë pas, Berisha shfrenoi dozën e sulmeve, duke u hakmarrë edhe ndaj Escobar, zyrtar i cili kërkon arrestimin e “non gratës”.
“E vërteta është se historia e gjobave nuk është vetëm veprim i McGonigal dhe famëzinjve të tij, Duçka dhe Neza. Historia e gjobave është më e gjerë. Siç denoncoi haptaz dhe me guxim ish-deputeti Myslim Murrizi, pas vitit 2019 flitej për lista me të ‘blacklistuar’ dhe përgojoheshin emra.
Gabriel Escobar, Yuri Kim, Lulzim Basha, Edi Rama. Kjo është e vërteta e pamohueshme. Ky realitet jo vetëm që nuk u përgënjeshtruar nga Yuri Kim, por ajo thërriste biznesmenë dhe i kërcënonte në ambasadë me blacklistim nëse mbështesin Sali Berishën. Një lukuni e tërë u lëshua mbi biznesmenët shqiptarë për t’i gjobitur ata në mënyrën më antinjerëzore. Vizat, i përdori në këtë funksion Yuri Kim”, tha ai.
Por amerikanët sot e kanë paralajmëruar Saliun. Ata kanë kërkuar të ndalë sulmet e akuzat ndaj diplomatëve amerikanë, teksa e kanë vënë sërish theksin te goditja e atyre që janë zhytur në afera korrupsioni. Pra sado Saliu po mundohet që të përdorë skandalin “McGonigal” për tu afruar me amerikanët, më shumë zhytet në baltë.
