Kryetari i Partisë së Lirisë, Ilir Meta duket se është një hap larg burgut. Zoti Meta është një ndër politikanët që prej 30 e kusur vitesh demokracie akuzohet se është përfshirë në afera korruptive dhe kriminale, ndërkohë që mbretërimit të tij, për shkak se nuk i ka hyrë gjemb në këmbë, po i vjen fundit.
Meta që ka mbajtur poste të rëndësishme në Shqipi si ministër, zëvendëskryeministër, kryeministër, kryetar i Kuvendit, Presidenti i Republikës apo edhe deputet, pritet të arrestohet me urdhër të Strukturës së Posaçme Kundër Krimit të Organizuar dhe Korrupsionit (SPAK).
Paralajmërimin e ka bërë ish-deputeti Halit Valteri, i cili madje e ka kallëzuar atë së bashku me bashkëshorten e tij Monika Kryemadhi në SPAK, teksa i akuzon për fshehje të ardhurash, korrupsion dhe çelje të llogarive anonime.
Zoti Valteri ka qenë i ftuar në një studio televizive, ku mes të tjerash shprehu bindjen se deri në vjeshtë një ish-president do të jetë në burg, referuar ish-presidentit Meta. “Mendoj se para vjeshtës një ish-president do të jetë në burg”, deklaroi ai.
Dosja që do fundosë Metën
Ndërkohë gazeta “SOT” po rikthen për lexuesit edhe një prej dosjeve përvëluese që pritet të fundosë ish-presidentin Ilir Meta.
Më konkretisht ish-deputeti Halit Valteri në kallëzimin e bërë pak muaj më parë në SPAK kundër çiftit Meta-Kryemadhi, ka përfshirë prova si CD, artikuj, të dhëna bankare, linja fluturimi, adresat e kompanive.
“Korrupsion i Pasiv i Zyrtareve të lartë ose të Zgjedhurve Vendore, Neni 260 i Kodit Penal; Pastrimi i produkteve të veprës penale ose veprimtarisë kriminale, Neni 287 i Kodit Penal; Fshehja e te ardhurave, Neni 180 Kodit Penal;
Veprime që pengojnë zbulimin e së vërtetës, Neni 301 i Kodit Penal; Çelja e llogarive anonime, Neni 287 i Kodit Penal”, u shpreh ai pak javë më parë gjatë një interviste për gazetën “SOT”. Pra, nëse shikojmë me kujdes akuzat, Meta dhe Kryemadhi rrezikojnë disa vite burg.
Po ashtu, Valteri gjatë reagimit të tij për gazetën “SOT”, theksoi se kallëzimi vjen pas artikullit të “Eureporter” që tregon skandalin ku çifti është i përfshirë në lobime ruse dhe kompani të lidhura ngushtë me Kremlinin dhe kanë bërë transferta për kompani off-shore me emrat e tyre personal.
Sipas Valterit, Meta dhe Kryemadhi posedojnë kompani ku kanë bërë lëvizje të ndryshme bankare dhe nuk i kanë deklaruar.
Kryemadhi anashkalon institucionet shqiptare
Por duke qenë se është një çështje e ndejshme, nga një verifikimi i gazetës “SOT”, rezulton se ish-kryetarja e Lëvizjes Socialiste për Integrim, Monika Kryemadhi nuk rezulton të ketë deklaruar asnjë nga llogaritë bankare në Zvicër dhe vendet të tjera europiane përfshi edhe Qipron nga ku janë bërë pagesa apo ka marrë edhe para nga kompanitë off shore.
Për më tepër në një nga faturat e transfertave bankare Kryemadhi rezulton se ka marrë para në formë dividenti nga ana e kompanive off shore me lidhje ruse. Ky fakt është një shkelje e ligjit për të cilin deputeti humb menjëherë mandatin sepse ka bërë deklarim të rremë, por edhe vendoset nën hetim.
Nëse hetimi certifikon vërtetësinë e dokumenteve që implikojnë Kryemadhin, atëherë mbi deputeten e Partisë së Lirisë rëndojnë disa akuza, që nga ajo e deklarimit të rremë, pastrimi i parave, fshehje të pasurisë.
Hapi i parë në këtë rast duhet të kryet nga SPAK, i cili minimalisht duhet të verifikojë duke parë deklarimin e pasurive të bëra nga Monika Kryemadhi.
Arrestimi i Ahmetajt, reagon Valteri
Nga ana tjetër ish-deputeti Halit Valteri u shpreh gjatë një prononcimi për mediat se Partia Socialiste e ka të qartë se ish-zv/kryeministri Arben Ahmetaj duhet të përballet me ligjin dhe të vuajë pasojat e veprimeve që ka kryer.
Madje Valteri shtoi se janë 5 ministra që kanë firmosur për inceneratorët. “Opinion i PS në raport me Ahmetajn është i qartë dhe i prerë të përballet me ligjin dhe ta zgjidhë vetë e të vuaj pasojat.
Do kemi një gjykim që do të dënohet vetëm për shpërdorim detyre. A do të ketë persona të tjerë të përfshirë se kanë qenë 5 ministra që kanë firmosur aty. Të 5 ministrat 2 janë të LSI-së dhe 3 të mazhorancës”, deklaroi Valteri.
Box 2
5 veprat penale që renditi Halit Valteri në SPAK kundër çiftit Meta-Kryemadhi
1. Korrupsion i pasiv i zyrtarëve të lartë ose të zgjedhurve vendore, Neni 260 i Kodit Penal
2. Pastrimi i produkteve të veprës penale ose veprimtarisë kriminale, Neni 287 i Kodit Penal
3. Fshehja e të ardhurave, Neni 180 Kodit Penal
4. Veprime që pengojnë zbulimin e së vërtetës, Neni 301 i Kodit Penal
5. Çelja e llogarive anonime, Neni 287 i Kodit Penal
