Armando Broja është dëshirë e kahershme e West Hamit në Premier League. Sulmuesi i Kombëtares u penalizua nga një dëmtim i gjatë që e mbajti jashtë për më shumë se dhjetë muaj,çka ndikoi në formën e tij dhe në pozitat që 22-vjeçari ka në ekip.
Tanimë “The Sun” bën me dije se West Hami e kërkon djaloshin kuqezi që në janar dhe është gati të paguajë shumën e duhur për të. 30 milionë euro kërkon Chelsea, me palët që mund të futen në negociata.
Broja, i dalë nga moshat e Bluve ka kontratë deri në 2028 me Chelsea dhe këtë sezon nuk ka marrë shumë minuta nga trajneri Pochettino. Kalimin e Brojës te West Ham e ka përmendur edhe gazetari Paul Broun i “GiveMeSport”.
Duket se e ardhmja e Brojës është larg Chelseas, teksa Pochettino kërkon që ta provojë edhe në disa takime, duke qenë se sulmuesi tjetër, Nicolas Jackson do jetë në Kupën e Afrikës me Senegalin.
Veç West Ham, edhe Fulham po në Londër shfaqi interes për Brojën. Tanimë edhe vetë sulmuesi nuk do dëshironte një huazim, por një kalim përfundimtar në një ekip, paçka lidhjes së tij me Chelsean. Nëse Broja do lëvizë nga Blutë, kjo pritet të shihet deri në datën 31 janar të këtij viti.
