Nga nisja e funksionimit, Prokuroria e Posaçme kundër Korrupsionit dhe Krimit të Organizuar është bërë “filtri” më rigoroz i ligjshmërisë së procedurave tenderuese të institucioneve publike. Por për të funksionuar normalisht si institucion shtetëror, SPAK duhet të zhvillojë edhe vetë procedura të tilla.
Referuar të dhënave zyrtare të shpenzimeve buxhetorë të SPAK për vitin 2023, pas pagave të prokurorëve, agjentëve të Byrosë Kombëtare të Hetimit dhe personelit, zërin më të kushtueshëm në buxhet e zënë shpenzimet për blerje të pajisjeve e sisteme elektronike për rritjen e sigurisë kibernetike dhe mbështetjen e hetuesve në terren. Blerje të tilla, realizohen përmes procedurave të prokurimit.
Sipas të dhënave zyrtare, gjatë vitit 2023, SPAK ka filluar një procedurë prokurimi për blerje të sistemeve e pajisjeve të teknikës operative, që do të përdoren për rritjen e efektivitetit të hetimeve.
Kjo procedurë është klasifikuar “sekret” dhe është parashikuar në shumën e 101 milionë lekëve të rinj, gati 1 milionë euro. Një tjetër procedurë e nisur është ajo për blerje sistemesh dhe pajisjesh elektronike në shumën e 84.5 milionë lekëve. Ndonëse të larta, SPAK duket se i ka mbuluar me punën e tij këto shpenzime.
Kjo për faktin se gjatë vitit 2023 për Prokurorinë e Posaçme është miratuar një grant prej gati 170 milionë lekësh me burim nga Agjencia e Administrimit të Pasurive të Sekuestruara, agjencia që menaxhon pasuritë që më së shumti janë sekuestruara nga vetë SPAK.
Po sipas burimeve zyrtare, për plotësimin e nevojave të SPAK me mallra, shërbime dhe investime gjatë vitit 2023 janë iniciuar 50 procedura prokurimi. Për finalizimin e tyre janë nënshkruar 46 kontrata dhe mini-kontrata me kompani të ndryshme tregtare.
