Gazetari Adriatik Doçi i ftuar në emisionin Shqip nga Dritan Hila në DritareTV foli për Ilir Metën dhe Monika Kryemadhin, për çështjet gjyqësore që janë hapur ndaj tyre në SPAK, një prej të cilave është një hetim pasuror. Gazetari tregon shumën marramendëse të pasurisë që ka vënë Monika Kryemadhi që nisi me një kredi 50 milionë lekë të vjetër.
“Jo rastësisht u mor në pyetje nëna e Monika Kryemadhit. Deklarimi i saj është i dyshimtë për shkak se pasuria që ka prodhuar ajo tokë për të cilën u thirr ajo në SPAK, është marramendëse. Kryemadhi ka marrë një tokë 1900 metra katrorë.
1200 i ka blerë me një kredi 50 milionë lekë të vjetër, ndërsa 700 metra deklaron se ia ka dhënë vëllai. Ajo lidhi një kontratë me një biznesmen-oligark, i cili e ndërtoi pallatin dhe Kryemadhi ka përfituar 35% të pallatit. Në deklarimin e pasurisë Kryemadhi thotë se është përfituese 100% e këtij 35%-shi.
Pra deklarimi i nënës së saj para SPAK-ut që; unë kam qenë pronare e pronës që ia ka dhënë për ndërtim, është i dyshimtë pasi nuk dihet nëse bëhet fjalë për ndonjë pallat tjetër, ose tokë tjetër, apo bëhet fjalë për këtë pallat që Kryemadhi e ka deklaruar në emër të saj. Pjesa tjetër që është e pabesueshme është që nga ky pallat që buron me 50 milionë lekë të vjetra që ka blerë tokën, Monika Kryemadhi ka siguruar vilën në Gjirinë e Lalëzit e cila ka një vlerë disa milionë euro.
Por ashtu ka blerë dhe një superapartamen te Kodrat e Diellit me sipërfaqe rreth 500 metra katrorë që mund të ketë një vlerë rreth 1 milionë euro. Dhe ka shitur disa apartamente me vlerë mbi 1 milionë euro. Pra ka krijuar një pasuri përrallore me mbi 10 milionë euro duke nisur nga 50 milionë lekë kredi”, tha Doçi.
