Inspektori i Lartë i Drejtësisë mësohet se ka nisur procedim disiplinor për gjyqtarin e GJKKO, Erjon Bani, për shkelje të përsëritura, vendime në kundërshtim të hapur me ligjin dhe në konflikt interesi. Sipas burimeve, ILD ka nisur një procedim disiplinor kryesisht për Erjon Banin, i njohur si një gjyqtar kamikaz dhe për vendime skandaloze. Në vitin 2022, Erjon Bani shpalli të pafajshme ish anëtaren e Komisionit të Pavarur të Kualifikimit (KPK), Etleda Çiftja, e akuzuar nga SPAK për deklarim të rremë të pasurisë dhe falsifikim dokumentash. Vendimi është në konflikt flagrant interesi.
Gjyqtari Erjon Bani u konfirmua në detyrë në Tetor 2021 nga një trupë e Vetingut, ku bënte pjesë edhe e pandehura, Etleda Çiftja, e shpallur e pafajshme nga Bani. Çiftja kishte votuar pro Banit, i cili nga ana e tij i ktheu reston, duke e shpallur të pafajshme, në vend që të hiqte dorë nga gjykimi.
Ndërkaq, në shkelje të Kodit Etik, gjyqtari Erjon Bani u prononcua në media për dosjen e sterilizimit. Duke dalë jashtë komptencave, Bani u shpreh në media për skenare, bëri parashikime si Baba Vanga, insinuata, foli për persona të implikuar, duke bërë politikë, ndërkohë që nuk ishte as gjyqtar themeli, por paraprak.
Nuk kemi të bëjmë me një rast të izoluar, por me një gjyqtar përsëritës. Në vitin 2021, gjyqtari Erjon Bani, vendosi në dhomë këshillimi, duke lënë në fuqi masën e sigurisë arrest me burg ish-ministrin Lefter Koka.
Vendimin e tij gjyqtari e arsyeton jo se Koka paraqiste rrezikshmëri të lartë shoqërore, apo mund të prishte provat e hetimit, siç kërkohet nga ligji për vendime të tilla të ndërmjetme, por për imazhin e institucioneve shqiptare përballë ndërkombëtarëve. Pra, një ish ministër duhet të qëndrojë në burg për imazhin për të përmirësuar imazhin e drejtësisë. As gjyqtarët e regjimit komunist nuk arrinin deri në këtë pikë.
Ja çfarë shkruan Erjon Bani në vendim; “Në situatën aktuale, ekziston një opinion mosbesues nga opinioni shoqëror, por edhe nga institucionet ndërkombëtare ndaj organeve shtetërore dhe në veçanti ndaj organeve të drejtësisë lidhur me luftën kundër korrupsionit. Mbizotëron një opinion mosbesues se organet shtetërore dhe organet e drejtësisë nuk kryejnë detyrën e tyre në lidhje me luftën kundër korrupsionit dhe nuk ndëshkojnë rastet e korrupsionit të nivelit të lartë. Pasojat e këtij opinioni mosbesues kanë ndikuar dhe ndikojnë në imazhin e vendit në raport me lirinë ekonomike dhe shtetin ligjor, si dhe në zhvillimin ekonomik të shoqërisë dhe të aktiviteteve ekonomike private”.
Erjon Bani ka miratuar edhe ëndrrat dhe sajesat e noterit Osl Dado për Erion Veliajn. Asnjë gjyqtar në GJKKO nuk pranoi për 17 ditë të konfirmonte kërkesën e Ols Dados për arrestimin e Veliajt, bazuar në trillime dhe gjysmë të vërteta. Romanin triller të Ols Dados e mori përsipër vetëm kamikazi Erjon Bani.
